AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Filologiya fakültəsində “Üzeyir Hacıbəyli – 140: Şəxsiyyət, sənət və müasirlik” mövzusunda elmi seminar təşkil olunub.

Tədbirdə BDU-nun Azərbaycan ədəbiyyatı tarixi kafedrasının dosenti Məti Osmanoğlu məruzə ilə çıxış edib.

Məruzəçi nitqində Azərbaycan Respublikasının Prezidenti İlham Əliyevin Sərəncamına əsasən, görkəmli bəstəkar, publisist, dramaturq Üzeyir Hacıbəylinin 140 illik yubileyi ilə bağlı ölkə üzrə silsilə tədbirlərin keçirildiyini diqqətə çatdırıb. O vurğulayıb ki, Üzeyir Hacıbəylinin əsərlərində “millət” sözü bir dəfə belə işlədilməsə də, onun bütün yaradıcılığı bu anlayışın mahiyyətini ifadə edir: “Millət anlayışı və milli özünüdərk obyektiv bir zərurətdən – xalqın özünü qorumaq və modern dünyaya çıxmaq ehtiyacından doğurdu”.

Məti Osmanoğlu qeyd edib ki, Üzeyir Hacıbəyli həmin dövrdə toplumun millət kimi formalaşmasında mühüm rol oynayıb. Məruzəçi bəstəkarın həyat və yaradıcılıq yoluna da nəzər salıb.

Seminarda “Üzeyir bəyi bizim müasirimizə çevirən nədir?” sualı müzakirəyə çıxarılıb, tələbələr bu suala cavab axtarıblar.

Sonda Filologiya fakültəsinin dekanı Elçin Məmmədov Üzeyir Hacıbəylinin 140 illiyi ilə bağlı tədbirlərin davam etdiriləcəyini bildirib və tələbələrə millət kimi formalaşma prosesində mühüm rol oynamış bu böyük şəxsiyyətin irsini daha dərindən öyrənməyi tövsiyə edib.