BDU-da Ümumdünya Psixi Sağlamlıq Günü qeyd olunub
Bakı Dövlət Universitetinin (BDU) Psixoloji yardım sektoru, Sosial elmlər və psixologiya fakültəsinin birgə təşkilatçılığı ilə 10 oktyabr - Ümumdünya Psixi Sağlamlıq Günü münasibətilə maarifləndirici təlim keçirilib.
“Sağlam təməl – sağlam gələcək” devizi altında keçirilən təlimdə psixoloq peşəsinin cəmiyyətdə rolu və məsuliyyəti, sosial medianın psixikaya təsiri, eləcə də psixoloji sağlamlıq və dayanıqlılığın qorunması yolları müzakirə olunub.
Təlimdə Psixoloji yardım sektorunun psixoloqları Natəvan Həsənzadə və İlkanə Mənsumova, Psixologiya kafedrasının dosenti, psixologiya üzrə fəlsəfə doktoru Kamilə Kazımova, Sosial elmlər və psixologiya fakültəsinin sosial məsələlər və tələbələrlə iş üzrə dekan müavini Nəzakət Kərimova təlimçi qismində çıxış ediblər. Bildirilib ki, 1992-ci ildən etibarən hər il oktyabrın 10-u Ümumdünya Psixi Sağlamlıq Günü kimi qeyd edilir. Sağlamlığın ayrılmaz və əhəmiyyətli hissəsi olan psixika hər kəsə öz bacarıq və şəxsi potensialını nümayiş etdirməyə, adi həyat streslərini dəf etməyə, məhsuldar və faydalı iş görməyə, cəmiyyətə xeyir verməyə imkan yaradır. Ümumdünya Səhiyyə Təşkilatının məlumatına görə, hazırda dünyada 1 milyarda yaxın insan müxtəlif psixi xəstəliklərdən əziyyət çəkir. Hər il 3 milyon nəfər alkoqoldan və hər 40 saniyədə bir nəfər intihar nəticəsində həyatını itirir.
Təlim zamanı tələbələrə psixoloji yükün effektiv idarə olunması, stresə davamlılıq bacarıqlarının formalaşdırılması, emosional tükənmişliyin qarşısının alınması, effektiv ünsiyyət bacarıqları, şəxsi və peşəkar sərhədlərin qorunması istiqamətlərində faydalı tövsiyələr verilib.
Tədbirin sonunda tələbələri maraqlandıran suallar cavablandırılıb, iştirakçılarla fikir mübadiləsi aparılıb.
