BDU-da “TEKNOFEST-2025”lə bağlı infosessiya
“Bilim Bakı” Mərkəzinin rəhbəri, “TEKNOFEST”in Azərbaycandakı rəsmi nümayəndəsi Ahmet Köse Bakı Dövlət Universitetinin (BDU) tələbələri üçün infosessiya keçirib.
BDU-nun Tələbə Elmi-Texniki Yaradıcılıq Mərkəzinin direktoru İlyas Nəsibov tələbə və gənc tədqiqatçılar üçün yeni imkanlar açan “TEKNOFEST”də 2022-ci ildən bəri iştirak edən BDU komandalarının 6-sının qalib olduğunu, 2-sinin isə yarışı birinciliklə başa vurduğunu bildirib. Qeyd edib ki, BDU komandaları Şimali Kipr Türk Respublikasında keçiriləcək “TEKNOFEST-2025” üçün də həvəslə hazırlanır.
Daha sonra Ahmet Köse dünyanın ən böyük kosmos, aviasiya və texnologiya festivalı olan “TEKNOFEST-2025”lə bağlı geniş təqdimat edib. “TEKNOFEST-2025”də komandalar 51 əsas, 117 alt yarışma kateqoriyası üzrə yarışacaqlar. Festivalda iştirak üçün qeydiyyat fevralın 20-dək davam edəcək.
Tədbirin sonunda Ahmet Köse yarışmaya qatılmaq istəyən BDU komandalarının suallarını cavablandırıb.
