BDU-da tədbir: “Tarixin qanlı səhifəsi”
Bakı Dövlət Universitetinin (BDU) Coğrafiya fakültəsində 20 Yanvar faciəsinin 36-cı ildönümünə həsr olunmuş “Tarixin qanlı səhifəsi” adlı anım tədbiri keçirilib.
Fakültə rəhbərliyinin və Tələbə Gənclər Təşkilatının (TGT) birgə təşkilatçılığı ilə keçirilən tədbirdə Dövlət himni səsləndirilib, 20 Yanvar şəhidlərinin əziz xatirəsi bir dəqiqəlik sükutla yad edilib.
Coğrafiya fakültəsinin dekanı, professor Məqsəd Qocamanov 20 Yanvar hadisələrinin Azərbaycan xalqının tarixində silinməz iz buraxmış faciələrdən biri olduğunu bildirib. O qeyd edib ki, bu qanlı hadisə xalqımızın azadlıq və müstəqillik uğrunda mübarizəsinin bariz nümunəsidir. Dekan 20 Yanvar şəhidlərinin göstərdiyi qəhrəmanlığın xalqımız tərəfindən daim ehtiramla xatırlandığını vurğulayıb, gənclərin bu tarixi hadisələri dərindən öyrənməsinin və milli-mənəvi dəyərlərə bağlı ruhda formalaşmasının vacibliyini diqqətə çatdırıb.
Tədbirin bədii hissəsində 20 Yanvar faciəsinə həsr olunmuş şeirlər səsləndirilib, mövzu ilə bağlı videoçarx nümayiş etdirilib, həmçinin həmin gecənin ağrılı anlarını əks etdirən səhnəcik təqdim olunub.
