BDU-da tədbir: “Hibrid təhdidlərə qarşı mübarizədə transmilli internet korporasiyaları ilə iş”
Bakı Dövlət Universitetində (BDU) Azərbaycan Respublikasının Qeyri-hökumət Təşkilatlarına Dövlət Dəstəyi Agentliyinin dəstəyi ilə “Hibrid təhdidlərə qarşı mübarizədə transmilli internet korporasiyaları ilə iş” layihəsinin ilk tədbiri keçirilib.
Layihənin məqsədi gənclər arasında kibertəhlükəsizliklə bağlı savadlılığı artırmaq, hibrid təhdidlərə qarşı mübarizə sahəsində dövlət və özəl sektor əməkdaşlığını gücləndirmək, həmçinin transmilli platformalarla qarşılıqlı əlaqələrin inkişafına dəstək verməkdir.
Tədbirdə BDU-nun Elmi fəaliyyətin təşkili və innovasiyalar Mərkəzinin direktoru Farid Nağıyev, Tətbiqi riyaziyyat və kibernetika fakültəsinin dekanı Ələkbər Əliyev, fakültənin müəllim və tələbələri iştirak ediblər. Fakültə dekanı Ələkbər Əliyev qeyd edib ki, fakültədə “Kompüter elmləri”, “İnformatika müəllimliyi” və “İnformasiya təhlükəsizliyi” ixtisasları üzrə yüksək ixtisaslı kadrlar hazırlanır. Tətbiqi riyaziyyat və kibernetika fakültəsinin məzunları dünyanın müxtəlif ölkələrində, o cümlədən Azərbaycanda uğurla fəaliyyət göstərir, yüksək vəzifələrdə çalışırlar. Daha sonra İnformatika kafedrasının dosenti Natiq Quliyev fakültədə fəaliyyət göstərən Kibertəhlükəsizlik Klubu barədə məlumat verdi.
Tədbir zamanı Dövlət Təhlükəsizliyi Xidmətinin Milli Kibertəhlükəsizlik Mərkəzinin nümayəndəsi Elvin Balacanov kibertəhlükəsizlik sahəsində dövlətin həyata keçirdiyi tədbirlər və milli strategiyanın əsas istiqamətləri haqqında danışıb. Layihə rəhbəri, hüquq üzrə fəlsəfə doktoru Təbriz Cəfərov hibrid təhdidlərin informasiya məkanında yaratdığı risklərdən və onlara qarşı mübarizənin hüquqi-praktik aspektlərindən bəhs edib.
Azərbaycan Kibertəhlükəsizlik Təşkilatları Assosiasiyasının (AKTA) Baş katibi Fidan Əhmədova AKTA-nın bu sahədə gördüyü işlər və maarifləndirici təşəbbüslər haqqında məlumat verib. AKTA ekspertləri - Rəqəmsal İnkişaf və Nəqliyyat Nazirliyinin nümayəndəsi Lalə Məmmədli transmilli internet korporasiyalarının təhlükəsizlik standartları, Rəşad Əliyev isə texniki təhlükəsizlik standartları və kibergigiyena qaydaları haqqında çıxış ediblər.
Tədbir çərçivəsində tələbələr kibertəhlükəsizlik və hibrid təhdidlər üzrə mövcud risklərə qarşı effektiv yanaşmalar və texnoloji həllər barədə məlumatlandırılıblar.
Tədbirin sonunda tələbələrin sualları cavablandırılıb.
