BDU-da tanınmış şair Qəşəm Nəcəfzadə ilə görüş
Bakı Dövlət Universitetinin (BDU) Filologiya fakültəsi Tələbə Gənclər Təşkilatının (TGT) təşkilatçılığı ilə Azərbaycan Yazıçılar Birliyinin İdarə Heyətinin üzvü, Əməkdar mədəniyyət işçisi, tanınmış şair Qəşəm Nəcəfzadə ilə görüş keçirilib.
Filologiya fakültəsinin TGT sədri Hümbət Bədəlov Qəşəm Nəcəfzadənin həyat və yaradıcılıq yoluna nəzər salıb. Bildirib ki, tanınmış şairin indiyədək 40-a yaxın kitabı çap olunub. Bu kitablardan 18-i xarici ölkələrdə işıq üzü görüb, şeirləri 20-dən çox dilə tərcümə olunub.
Fakültənin sosial məsələlər və tələbələrlə iş üzrə dekan müavini Anar Fərəcov çıxışında Qəşəm Nəcəfzadənin zəngin yaradıcılığından bəhs edib, onun poeziyasında xalqın ruhunu, torpağın nəfəsini duymağın mümkün olduğunu vurğulayıb.
Çağdaş ədəbi-bədii proseslərə dair fikirlərini bölüşən Qəşəm Nəcəfzadə tələbələrlə görüşməkdən məmnuniyyət duyduğunu bildirib, gənc ədiblərə yaradıcılıqla bağlı məsləhətlər verib. Sonra şair sevilən şeirlərini səsləndirib.
Görüş zamanı şairin həyat və yaradıcılığını əks etdirən videoçarx nümayiş etdirilib.
Şair Ətraf Sərraf da Qəşəm Nəcəfzadənin yaradıcılığına dair fikirlərini bölüşərək, onun poetik dilinin orijinallığından bəhs edib.
Görüşün sonunda Qəşəm Nəcəfzadə tələbələrə kitablarını hədiyyə edib.
