BDU-da “Sülh və gündəlik həyat: antropoloji baxış” mövzusunda elmi seminar keçirilib
Bakı Dövlət Universitetinin (BDU) Tarix fakültəsinin Arxeologiya və etnoqrafiya kafedrasında “Sülh və gündəlik həyat: antropoloji baxış” mövzusunda elmi seminar keçirilib.
Arxeologiya və etnoqrafiya kafedrasının müdiri, professor Tarix Dostiyev bildirib ki, tarix boyu insanlar, icmalar, tayfalar və dövlətlər arasında baş verən münaqişə və müharibələrin səbəbləri, onların cəmiyyətin sosial və mədəni həyatına təsiri antropoloji baxımdan təhlil edilir. Qeyd olunub ki, cəmiyyətlər arasında təcavüz meyllərinin yaranma səbəbləri insan təbiətindən başlayaraq iqtisadi və siyasi maraqlara qədər geniş spektri əhatə edir.
Seminarda AMEA-nın Arxeologiya və Antropologiya İnstitutunun Antropologiya Mərkəzinin rəhbəri, antropologiya elmləri doktoru, professor Əliağa Məmmədlinin məruzəsi dinlənilib. Məruzədə vurğulanıb ki, müharibə və hərbi münaqişələr insanların həyatında ciddi problemlər yaradır. Bu problemlər sırasında fiziki itkilər, sağlamlıq problemləri, psixoloji travmalar, sosial və ailə çətinlikləri, iqtisadi tənəzzül, yoxsulluq və məcburi köçkünlük kimi hallar xüsusi yer tutur. Sülh və əmin-amanlıq dövrü insanların sosial rifahı və inkişafı baxımından daha üstün mövqedə dayanır və müharibələrin vurduğu ziyanın aradan qaldırılması çox vaxt uzun illər tələb edir.
Elmi seminarda münaqişə və sülh antropologiyasının əsas istiqamətləri barədə məlumat verilib. Qeyd olunub ki, bu sahə müharibə, zorakılıq və dinc yanaşı yaşama kimi hadisələri təcrid olunmuş proseslər kimi deyil, mədəniyyətə, sosial münasibətlərə və gündəlik həyat təcrübələrinə bağlı olan sosial-mədəni proseslər kimi araşdırır. Antropoloqların münaqişələrin vasitəçilik yolu ilə həllində və münaqişədən sonrakı yenidənqurma prosesində əldə etdikləri təcrübə bu sahənin mühüm istiqamətlərindən biri kimi qiymətləndirilib. Qeyd edilib ki, antropoloji yanaşmaya görə, sülh təkcə müharibənin olmaması deyil, həm də davamlı mədəni bərpa və yerli ictimai iştirak tələb edən aktiv sosial prosesdir.
Məruzədə Vətən müharibəsinin nəticələrinin Azərbaycan xalqının milli özünüdərk prosesində və kimlik hissinin möhkəmlənməsində mühüm mərhələ olduğu diqqətə çatdırılıb. Bildirilib ki, münaqişə, sülh və cəmiyyətin transformasiyası ilə bağlı məsələlərin elmi baxımdan araşdırılması sosial və mədəni antropoloqlar qarşısında duran vacib vəzifələrdəndir.
Tədbir mövzu ətrafında müzakirələrlə davam edib.
