BDU-da millət vəkili, professor Kamilə Əliyeva ilə görüş
Bakı Dövlət Universitetinin (BDU) Biologiya fakültəsində millət vəkili, BDU-nun Genetika kafedrasının müdiri, professor Kamilə Əliyeva ilə görüş keçirilib.
Görüşdə Biologiya fakültəsinin dekanı, professor Afət Məmmədova 105 yaşını qeyd etməyə hazırlaşan Universitetdə həyata keçirilən yubiley tədbirlərindən danışıb. Afət Məmmədova qeyd edib ki, Kamilə Əliyeva orta məktəbi qızıl medalla bitirib, bir imtahandan “əla” qiymət almaqla BDU-nun Biologiya fakültəsinə daxil olub. Universiteti fərqlənmə diplomu ilə bitirdikdən sonra isə BDU-da müəllim, baş müəllim, dosent kimi çalışıb. Biologiya elmləri doktoru, BDU-nun professoru olan Kamilə Əliyeva insan genetikası, tibbi genetika, molekulyar genetika, sitologiya sahələrində müxtəlif dərslik, dərs vəsaitləri və elmi məqalənin müəllifidir. O, eyni zamanda millət vəkili kimi geniş ictimai-siyasi fəaliyyətlə məşğuldur.
Professor Kamilə Əliyeva gənclərə uğurlu karyera qurmağın əzmkarlıq və çalışqanlıqdan keçdiyini bildirib, alim, pedaqoq və millət vəkili kimi fəaliyyəti ilə bağlı onları məlumatlandırıb. O, əvvəlki dövrlə müqayisədə bugünkü tələbələrin intellekt səviyyəsinin daha yüksək olduğunu, peşəkar mütəxəssis kimi yetişmək üçün çoxlu imkanlar yarandığını deyib.
Sonda tələbələrin sualları cavablandırılıb.
