BDU-da Məzun Günü
2021-ci il 29 iyun tarixində Bakı Dövlət Universitetində (BDU) “Məzun günü” tədbiri keçirilib. Tədbir məhdud sayda məzunun iştirakı ilə açıq havada karantin rejiminin qaydalarına ciddi riayət olunmaqla təşkil olunub.
Tədbir Azərbaycan Respublikasının dövlət himninin səsləndirilməsi ilə başlayıb. Azərbaycan Respublikasının Dövlət Bayrağını BDU-nun Tarix fakültəsinin məzunu, Vətən Müharibəsi iştirakçısı Nəzər Əlizadə və BDU-nun bayrağını Universitetin məzunu, dünya çempionu və 2 qat Avropa çempionu Rövşən Bayramov qaldırıblar. Dövlət Himnini C.Naxşıvanski adına Hərbi lisüyin orkestri səsləndirib.
BDU-nun rektoru Elçin Babayev tədbirdə çıxış edərək bu il BDU-dan məzun olan 5963 tələbənin hər birini təbrik edib. E.Babayev ölkəmizdə təhsilə göstərilən dövlət qayğısından, Bakı Dövlət Universitetinin əldə etdiyi nailiyyətlərdən danışıb. 30 ilə yaxın işğal altında olan torpaqlarımızı azad etməklə Böyük Qələbənin qazanılmasında gənclərin rolundan bəhs edib, Vətən Müharibəsində şəhid olan qəhrəmanlarımızın, o cümlədən BDU-nun 18 şəhid məzununun daima xatirəsinin əziz tutulduğunu bildirib. Gənclərə öz tövsiyələrini verən rektor bildirib ki, builki məzunlar xoşbəxtdirlər ki, onlar Zəfər ilinin məzunlarıdırlar. Həmişə öz dövlətləri, xalqı və qəhrəmanları ilə qürur duymalıdırlar və əmini ki, Vətənə layiqli övlad kimi fəaliyyət göstərəcəkdirlər.
Elçin Babayev çıxışında qeyd edib ki, 102 illik tarixi olan Bakı Dövlət Universiteti təkcə Azərbaycanda deyil, bütün Müsəlman Şərqində ilk dünyəvi ali təhsil ocağı kimi dünya elminə, mədəniyyətinə, siyasətinə təsir göstərmək qüdrətinə malik yüzlərlə tarixi şəxsiyyətlər yetişdirdirib. Siz məzunların da bacarıqlı bir mütəxəssis kimi ölkəmizin tərəqqisində, cəmiyyətin inkişafında mühüm rol oynayacağınıza, fəaliyyətinizdə dövlətçilik prinsiplərini əsas tutacağınıza inanıram. BDU-ya tələbə kimi qəbul olunduğunuz gündən bəri biz - müəllimləriniz biliklərinizin atrırılması, potensialının üzə çıxarılması, dünyagörüşünüzün inkişaf etdirməsi yönündə əlindən gələni etməyə çalışıb. Siz gənclərin cəmiyyətin sosial-iqtisadi, ictimai-siyasi, mədəni həyatında iştirakının təmin edilməsi günümüzün vacib məsələlərindən biridir. Biz çox sevinirik ki, siz Bakı Dövlət Universitetinin missiyasını anlayır, ona dəyər verirsiniz.
Daha sonra tədbirdə Azərbaycan Respublikasının təhsil nazirinin müavini Firudin Qurbanov, Yasamal Rayon İcra Hakimiyyətinin başçısı Elşad Həsənov, Milli Məclisin üzvü Elnur Allahverdiyev çıxış edərək məzunları təbrik ediblər.
BDU-nun professor-müəllim heyəti adından Milli Məclisin üzvü, BDU-nun Ümumi dilçilik kafedrasının müdiri, akademik Nizami Cəfərov, Universitetin gənc müəllimləri adından Geologiya fakültəsinin müəllimi Ələkbər Mirzəyev, məzunlar adından Hüquq fakültəsindən məzun olan Şərqiyyə Məmmədova, məzun valideynləri adından Filologiya fakültəsinin məzunu Yaqut Abdiyevanın atası Qabil Abdiyev çıxış edərək məzunlara uğurlu yol arzulayıblar.
Tədbirə BDU-nun Mədəniyyət-yaradıcılıq Mərkəzinin hazırladığı musiqi nömrələri, rəqs və kompozisiyalar rəng qatıb. “Qarabağ Azərbaycandır” qum kompozisiyası (Lalə Hüseynzadənin təqdimatında), “Qarabağ” və “Azərbaycan naxışları” kompozisiyaları və s. rəqs və musiqi nömrələri təqdim olunub. Xalq artisti samir Cəfərov, əməkdar artist Nuriyyə Hüseynova, xalq artisti Gülyanaq Məmmədova, Çilənay Hüseynova, Aygün Məmmədova məzunlara öz musiqi töhfələrini veriblər.
Sonra universitet üzrə ən yüksək Ümumi Orta Müvəffəqiyyət Göstəricisi (ÜOMG) olan məzunlar - Bakalvr səviyyəsi üzrə Hüquq fakültəsinin tələbəsi Əliyeva Nəzrin Əmir qızı (ÜOMG=99,26), magistratura səviyyəsi üzrə Beynəlxalq münasibətlər və iqtisadiyyat fakültəsi Tağıyeva Turana Mahmud qızı (ÜOMG = 99,98) BDU-nun rektoru ilə birgə BDU-nun xatirə lövhəsinə öz adlarını həkk ediblər. Fakültələr üzrə bakalavr və magistratura səviyyələri üzrə ən yüksək ÜOMG göstəricisi əldə etmiş məzunlara hədiyyələr təqdim edilmişdir.
Tədbir BDU-nun himninin səsələndirilməsi ilə başa çatmışdır.
