BDU-da mədəni irsin qorunmasında rəqəmsallaşmanın roluna dair tədqiqatlar aparılır
Bakı Dövlət Universitetinin (BDU) İnformasiya və sənəd menecmenti fakültəsində “Mədəni irs və rəqəmsal informasiya mühiti” mövzusunda elmi seminar keçirilib. BDU-nun Sənəd menecmenti kafedrasının müdiri, dosent Nadir İsmayılov mövzu ilə bağlı məruzə ilə çıxış edib.
Məruzəçi Ümummilli Lider Heydər Əliyevin mədəni irsimizin mühafizəsi və inkişafındakı müstəsna xidmətlərini vurğulayaraq, bu siyasətin Prezident İlham Əliyev tərəfindən uğurla davam etdirildiyini bildirib. Qeyd olunub ki, hazırda işğaldan azad edilmiş ərazilərdə dağıdılmış mədəni irs nümunələrinin bərpası və milli sərvətlərimizin beynəlxalq səviyyədə tanıdılması istiqamətində mühüm tədbirlər görülür. Eyni zamanda, Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondunun milli-mənəvi dəyərlərimizin qorunmasına və yaşadılmasına misilsiz töhfələr verdiyi diqqətə çatdırılıb.
Bakı Dövlət Universitetinin bu istiqamətdə fəaliyyətindən bəhs edən natiq vurğulayıb ki, sahənin fundamental tədqiqi məqsədilə ötən il BDU-da Mədəni İrsi Araşdırmalar Mərkəzi yaradılıb. Mərkəzin yaradılması Azərbaycanın mədəni irsi ilə bağlı elmi-tədqiqat işlərinin yerinə yetirilməsi, elmi və elmi-kütləvi məqalələrin hazırlanması, bu istiqamətdə araşdırmaların sistemli xarakter alması baxımından mühüm əhəmiyyət kəsb edir.
Məruzədə mədəni irsin qorunması, mühafizəsi, rəqəmsallaşdırılması və gələcək nəsillərə ötürülməsi məsələləri, müasir informasiya-kommunikasiya texnologiyalarının bu sahədə yaratdığı yeni imkanlar geniş müzakirə olunub. Vurğulanıb ki, rəqəmsallaşdırma mədəni irsin qorunmasının müasir və perspektivli istiqamətlərindən biridir. Əlyazmaların, nadir kitabların, arxiv sənədlərinin, muzey eksponatlarının, tarixi-memarlıq abidələrinin və digər mədəni irs nümunələrinin rəqəmsal surətlərinin yaradılması onların fiziki təhlükələrdən qorunmasına, elmi-tədqiqatlar üçün əlçatanlığının artırılmasına və vahid informasiya məkanında təqdim edilməsinə imkan verir: “Müasir dövrdə mədəni irsin qorunması yalnız ənənəvi mühafizə mexanizmləri ilə məhdudlaşmır, həm də onun rəqəmsal mühitdə sənədləşdirilməsini, sistemləşdirilməsini, elmi tədqiqini, elektron informasiya resurslarına çevrilməsini və geniş istifadə üçün əlçatanlığının təmin edilməsini tələb edir”.
Tədqiqatda Azərbaycan Respublikasında mədəni irsin qorunması sahəsində formalaşmış milli qanunvericiliyin arxitekturası da şərh edilib. Qeyd olunub ki, mədəni irsin mühafizəsi kompleks hüquqi mexanizmlər əsasında həyata keçirilir və bu sistem mədəni sərvətlərin, tarix və mədəniyyət abidələrinin, arxeoloji irsin, muzey və arxiv materiallarının, kitabxana və digər sənəd-informasiya resurslarının qorunmasını müxtəlif hüquqi normalarla təmin edir.
Elmi seminar müzakirələrlə davam edib.
