BDU-da “Jurnalların idarə olunması və əsas redaktor bacarıqları” mövzusunda seminar keçirilib
Bakı Dövlət Universitetində (BDU) “Jurnalların idarə olunması və əsas redaktor bacarıqları” mövzusunda seminar keçirilib.
Seminarı giriş sözü ilə açan BDU-nun Elmi fəaliyyətin təşkili və innovasiyalar Mərkəzinin rəhbəri Mais Süleymanov keçirilən seminarın əhəmiyyətindən danışıb, belə tədbirlərin Universitetdə yüksək keyfiyyətli jurnalların nəşr olunmasına töhfə verəcəyinə əminliyini ifadə edib.
“Jurnalların idarə olunması və əsas redaktor bacarıqları” mövzusunda təqdimatla çıxış edən Q1 kateqoriyalı 2.259 impakt faktorlu “Historical Biology (An International Journal of Paleobiology)” jurnalının baş redaktoru Garez Dayk elmi jurnalların işinin təşkili məsələlərinə toxunub, beynəlxalq səviyyəli elmi jurnalın formalaşdırılması, inkişaf etmiş ölkələrdə elmi nəşrin beynəlxalq səviyyədə tanıdılması, elmi əsərlərin keyfiyyətinin artırılması kimi məsələlərlə bağlı məlumat verib. Elmi tədqiqatçıların, jurnalların və qurumların fəaliyyətlərinin qiymətləndirilməsi, elmi biliklərin analizində bibliometrik göstəricilər və istinadlardan geniş istifadə olunduğunu deyən G.Dayk bu məlumatların xüsusi istinad verilənləri bazasında toplanılaraq təyinatına görə emal olunduğunu qeyd edib. İstinad indeksi adlandırılan həmin analitik-informasiya sistemlərinin təyinatı, bibliometrik və elmmetrik tədqiqatlarda bu sahədə tanınmış mövcud sistemlərdən Web of Science və Elsevier-in Scopus bazalarını nümunə göstərib. G.Dayk jurnalların impakt faktorlarının akademik və iqtisadi-sosial formalarının əhəmiyyətindən danışıb, veb səhifələrinin əlçatanlığının vacibliyini qeyd edib.
G.Dayk elmi məqalələrin yazılmasına, onların düzgün strukturunun qurulmasına və nüfuzlu elmi jurnallarda çapa hazırlanmasına dair məsələlərdən bəhs edib. Təqdimatda Jurnalda anonim (double- blind) rəy prosesindən istifadə olunduğu, müəllifin (müəlliflərin) şəxsi məlumatlarının rəyçiyə açıqlanmadığı, rəyçinin şəxsi məlumatları müəllifə/müəlliflərə açıqlanmadığı bildirib. Seminarda materialların nəşrə hazırlaması prosesində nəşr etikasının gözlənilməsinin əhəmiyyəti qeyd edilib, redaksiya heyəti ilə yazışmalarda gözlənilən üslub qaydalarına toxunub, müəlliflərin qarşısına çıxan suallara aydınlıq gətirilib.
Seminarda çıxış edən BDU-nun rektoru Elçin Babayev BDU-nun elmi nəşrlərinin təkmilləşdirilməsi istiqamətində görülən işlərdən danışıb. Bu baxımdan nəşr olunan jurnalların beynəlxalq tələblərə uyğunlaşdırılması və beynəlxalq nüfuzlu bazalarda təmsilçiliyinin təmin edilməsinin həlli zəruri olan məsələlərdən olduğunu vurğulayıb. Milli elmi jurnalların, tədqiqatçıların və qurumların elmi fəaliyyətinin obyektiv qiymətləndirilməsi, onların elmi məhsuldarlığının müqayisəli təhlili üçün jurnalların beynəlxalq elmi bazalarda təmsil olunması vacibliyini vurğulayan rektor məqalələrin keyfiyyətinin artırılması istiqamətində müvafiq tövsiyələrini bildirib.
Təqdimatın sonunda mövzu ətrafında müzakirələr aparılıb, məruzəçi tərəfindən seminar iştirakçılarını maraqlandıran suallar cavablandırılıb.
