BDU-da iqtisadiyyatın müasir ekonometrik problemlərinin təhlili üzrə tədqiqatlar davam edir
Bakı Dövlət Universitetinin Beynəlxalq münasibətlər və iqtisadiyyat fakültəsinin Riyazi iqtisadiyyat kafedrasının müdiri, professor Elşar Orucov və həmin kafedranın doktorantı Nəzrin Burcalıyevanın həmmüəllifi olduqları “Banklarda faiz və qeyri-faiz gəlirlər arasındakı əlaqənin Furye kointeqrasiya analizi: “Azər Türk Bank”ın nümunəsində” (“Fourier Cointegration Analysis of the Relationship Between Interest and Noninterest Income in Banks: The Case of Azer Turk Bank”) adlı məqalə “Scopus” bazasında Q1 kvartilli jurnallar siyahısına daxil olan (IF: 2.3) “Economies” jurnalında dərc edilib:
https://www.mdpi.com/2227-7099/13/10/297
Məqalədə “Azər Türk Bank” üzrə rüblük məlumatlardan (2016Q1–2024Q3) istifadə etməklə faiz və qeyri-faiz gəlirləri arasındakı qarşılıqlı əlaqə Furye əsaslı innovativ üsullarla tədqiq edilib. Qeyri-xətti trendlər ətrafında tsiklik dalğalanmalar aşkar Furye-VECM tənlikləri ilə təsvir olunaraq modelləşdirilib. Furye funksiyalarını aşkar riyazi ifadələrlə VECM çərçivəsinə daxil etməklə, bu tədqiqatda tsiklik yayınmaları hamar qırılmalar və qeyri-xətti trendlər ətrafında modelləşdirmək üçün praktik, innovativ Fourier-VECM yanaşması təqdim edilib. Müəyyən olunub ki, klassik xətti yanaşmalarla müqayisədə bu yanaşma tsiklik komponentləri daha adekvat tutur, diaqnostikanın və proqnozlaşdırmanın dəqiqliyini artırır.
Alınmış nəticələrin tətbiqi risklərin qiymətləndirilməsini, stres-testləri və makroprudensial siyasətlərin effektivliyini artırır, Basel III tələblərinə uyğunluğu gücləndirir.