AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetində (BDU) ali təhsildə Dayanıqlı İnkişaf Məqsədlərinin (DİM) tədris və tədqiqat proseslərinə səmərəli inteqrasiyasını təşviq etmək məqsədilə təşkil olunan silsilə təlimlər uğurla davam etdirilir. Növbəti təlim BDU-nun Keyfiyyət Təminatı Mərkəzinin təşəbbüsü və rektorun keyfiyyət təminatı üzrə müşaviri Asiman İlyasovun rəhbərliyi ilə həyata keçirilib. Tədbirin əsas məqsədi iştirakçılara Birləşmiş Millətlər Təşkilatı tərəfindən müəyyənləşdirilmiş 17 Dayanıqlı İnkişaf Məqsədinin ali təhsildə əhəmiyyətini izah etmək və bu məqsədlərin elmi-tədqiqat fəaliyyətlərinə inteqrasiyası ilə bağlı praktiki bilik və bacarıqları aşılamaq olub.

Təlim zamanı beynəlxalq təcrübədə tətbiq edilən qabaqcıl metodologiyalar iştirakçıların diqqətinə çatdırılıb, interaktiv yanaşma ilə keçirilən müzakirələr isə iştirakçıların aktiv iştirakını və fikir mübadiləsini təşviq edib.

Sözügedən təşəbbüs BDU-nun ali təhsildə dayanıqlılıq və qlobal çağırışlara cavab verən yanaşmaların tətbiqinə xüsusi önəm verdiyini və bu istiqamətdə sistemli fəaliyyət göstərdiyini nümayiş etdirir. Həmçinin, bu təlimlər BDU-nun uzunmüddətli strateji inkişaf planları çərçivəsində DİM-lərin tədris və tədqiqat fəaliyyətlərinə effektiv şəkildə inteqrasiya edilməsinə xidmət edən əsas fəaliyyət istiqamətlərindən biri kimi qiymətləndirilir.