BDU-da antmikrob agentlərin sintezi və tətbiqi üzrə tədqiqatlar davam edir
Son dövrlər bakterial yoluxmaların antibiotik maddələrə qarşı davamlığın yaranması və inkişafı ilə əlaqədar olaraq yeni antimikrob agentlərin axtarışına diqqət artmışdır. Belə maddələrdən bir qismi də müxtəlif bakteriyalar tərəfindən sintez olunan bakteriosinlərdir. Bakteriosinlər kiçik molekullu polipeptidlər olub pathogen bakteriyaların inkişafına əngəl törədir.
Bakı Dövlət Universitetinin Tədqiqat, İnkişaf və İnnovasiyalar üzrə Mükəmməllik Mərkəzinin Mikrobiologiya və virusologiya ETL-in əməkdaşlarının müxtəlif xarici ölkələrdən olan tədqiqatçılarla bu istiqamətdə birgə tədqiqatları uğurla davam edir və alınmış nəticələrin tibbdə tətbiqi üzrə innovativ layihələr hazırlanır.
Belə ki, ETL-in müdiri, professor Xudaverdi Qənbərovun həmmüəllifi olduğu “Bacteriocins: Recent advances in application as an antibacterial alternative” (“Bakteriosinlər: Son nailiyyətlər və alternativ antibakterial vasitə kimi tətbiqi”) adlı icmal məqalə Web of Sience bazasinda indekslənən (Q3 kvartil kateqoriyalı, IF: 2.837) Current Pharmaceutical Biotechnology (2021, v. 21(3), p. 211-220) jurnalında cap olunub.
(DOI: 10.2174/1389201022666210907121254)
Məqalədə bakteriosinlərin patogen bakteriyaların hüceyrələrinə təsir mexanizmləri analiz edilir və onlardan alternativ mübarizə vasitəsi kimi istifadə yolları göstərilir.