Bakı Dövlət Universitetinin Enactus komandası “Ecoprint” layihəsi ilə finalda
Bakı Dövlət Universitetinin Enactus komandası “Ecoprint” layihəsi ilə müxtəlif beynəlxalq startap və innovasiya məzmunlu yarışlarda iştirak edib. “Ecoprint” Azərbaycanda sosial, iqtisadi və ekoloji vəziyyətə dəstək veməklə BMT-nin dayanıqlı inkişafa dair 17 məqsədindən 8-ni tam əhatə edir.
“Ecoprint” layihəsi 2019-cu ildə “Hult Prize” Azərbaycan yarışının qalibi olaraq ölkəmizi 2020-ci ildə Türkiyədə, beynəlxalq Enactus yarışının qalibi olaraq 2020-ci ildə Niderland krallığında layiqincə təmsil edib. Ecoprint layihəsi 2020-ci il 13 mart tarixində Bakıda keçirilən “II Qlobal Mühəndislik Simpoziumu”na (GES) rəsmi tərəfdaş və sponsor olub. Layihə 2021-ci il 24 sentyabr tarixində Azərbaycan Respublikası Nəqliyyat, Rabitə və Yüksək Texnologiyalar Nazirliyininin İnnovasiyalar Agentliyinin təşkilatçılığı ilə “Discover Europe” proqramına qoşulub.
Bir çox uğurlar əldə etmiş “Ecoprint” layihəsi 08 fevral 2021-ci il tarixində “Avro-Asiya Startap Mükafatları” (Euro-Asian Startup Awards) Beynəlxalq yarışında 10 ölkə arasında regional finalın qalibi olub və 2021-ci ilin 15-18 noyabr tarixlərində Danimarka Krallığında (Kopenhagen) keçiriləcək, 113 ölkənin yarışacağı Global Startup Awards mükafatları yarışmasının “Grand Final” iştirakçısı vəsiqəsini qazanıb.
“Grand Final”da iştirak üçün komanda üzvlərindən 4 nəfər - Texnologiyaların transferi və innovasiyalar şöbəsinin müdiri, layihənin rəhbəri Mətanət Musayeva, Bioekologiya kafedrasının dosenti, layihənin koordinatoru Məhluqə Yusifova, komandanın kapitanı Rüstəm Həsənli və informasiya texnologiyaları mütəxəssisi Kamran Qasımov 2021-ci ilin 15-18 noyabr tarixlərində Danimarka Krallığında (Kopenhagen) keçiriləcək müsabiqəyə qatılacaqlar.
Ecoprint layihəsi haqqında daha ətraflı məlumat almaq üçün http://www.ecoprint.deirvlon.com, tədbir haqqında ətraflı məlumat almaq üçün https://euroasianstartupawards.com/, Global Startup Awards haqqında ətraflı məlumat almaq üçün https://www.globalstartupawards.com/ linklərinə keçid edə bilərsiniz.