Akademik Məhəmməd Mehdiyevin 80 yaşı tamam olur
Oktyabrın 2-də tanınmış alim, Əməkdar elm xadimi, Azərbaycan Milli Elmlər Akademiyasının (AMEA) həqiqi üzvü, Bakı Dövlət Universitetinin (BDU) Tətbiqi riyaziyyat və kibernetika fakültəsinin dekanı Məhəmməd Mehdiyevin 80 yaşı tamam olur.
Məhəmməd Fərman oğlu Mehdiyev 1941-ci ildə Laçın rayonunun Təzəkənd kəndində anadan olub. 1961-ci ildə orta məktəbi bitirərək Azərbaycan Dövlət Universitetinin (indiki Bakı Dövlət Universiteti) Mexanika-riyaziyyat fakültəsinə daxil olub. Universiteti bitirdikdən sonra aspiranturada təhsilini davam etdirib. 1970-ci ildə təyinatla AMEA-nın Riyaziyyat və Mexanika İnstitutunda kiçik elmi işçi vəzifəsində əmək fəaliyyətinə başlayıb. Sonralar həmin elmi müəssisənin baş elmi işçisi, şöbə müdiri, Xüsusi Konstruktor Bürosunun elmi işlər üzrə direktor müavini olub. 1991-ci ildən Bakı Dövlət Universitetində pedaqoji fəaliyyətə başlayıb. 2002-2018-ci illərdə Tətbiqi analizin riyazi üsulları kafedrasının müdiri olub. 2008-ci ildən Tətbiqi riyaziyyat və kibernetika fakültəsinin dekanıdır.
1975-ci ildə Rostov Dövlət Universitetində “Konik örtük və dəyişən qalınlıqlı dairəvi lövhə üçün üçölçülü gərginlik-deformasiya vəziyyətin asimptotik təhlili” mövzusunda namizədlik, 1989-cu ildə Leninqrad Dövlət Universitetində “Örtüklər üçün elastikiyyət nəzəriyyəsinin bəzi fəza məsələlərinin asimptotik təhlili” mövzusunda doktorluq dissertasiyalarını müdafiə edib. 1994-cü ildə professor elmi adını alıb, 2001-ci ildə AMEA-nın müxbir üzvü, 2014-cü ildə isə həqiqi üzvü seçilib.
Akademik M.Mehdiyev bərk cisim mexanikası sahəsində görkəmli mütəxəssisdir. Elastikiyyət nəzəriyyəsində yeni “bircins həllər” metod onun tərəfindən işlənib hazırlanıb. Bu metodun köməyi ilə örtük və lövhələr üçün elastikiyyət nəzəriyyəsinin üçölçülü məsələsindən ikiölçülü məsələyə keçid problemi öyrənilib, örtük və lövhələrin klassik nəzəriyyəsinin tətbiq olunma oblastı müəyyən edilib. Örtük və lövhələrin yeni tətbiqi nəzəriyyəsi verilib. İmpuls təsirli determinik oyunlarda yəhərvari nöqtənin varlığı üçün zəruri şərtlər tapılaraq həmin şərtlərin zəruri və kafi olduğu siniflər müəyyən edilib, qeyri-lokal şərtli optimal idarəetmə məsələsində optimallıq üçün birinci və ikinci tərtib zəruri şərtlər alınıb. Son illərdə akademik və onun tələbələri tərəfindən anizotropik örtüklərin ümumi nəzəriyyəsi yaradılıb və onun əsasında mövcud texniki nəzəriyyələrin tətbiq olunma oblastları müəyyən edilib.
Akademik M.Mehdiyev “AMEA-nın xəbərləri” (Mexanika buraxılışı) jurnalının redaksiya heyətinin üzvü və “Bakı Dövlət Universitetinin Xəbərləri” (Fizika-riyaziyyat seriyası) jurnalının baş redaktorunun müavinidir.
Onun rəhbərliyi ilə 20 elmlər namizədi, 2 elmlər doktoru hazırlanıb. 140 elmi əsərin, o cümlədən 4 monoqrafiya, 5 dərslik və dərs vəsaitinin müəllifidir.
Akademik M.Mehdiyev riyaziyyat və mexanika elminə verdiyi töhfələrə görə 2009-cu ildə “Əməkdar elm xadimi” fəxri adına layiq görülüb. 2019-cu ildə “Şöhrət” ordeni ilə təltif olunub.
Akademik Məhəmməd Mehdiyevi 80 illik yubileyi münasibətilə təbrik edir, ona uzun ömür, möhkəm cansağlığı, Azərbaycan elminin və təhsilinin inkişafı naminə gələcək fəaliyyətində yeni uğurlar arzulayırıq.