Əməkdar elm xadimi Natiq Atakişiyev BDU-da elmi seminar keçirib
Bakı Dövlət Universitetində (BDU) akademik Yusif Məmmədəliyevin 120 illik yubileyinə həsr olunmuş tədbirlər çərçivəsində Fizika və Mexanika-riyaziyyat fakültələrinin birgə təşkilatçılığı ilə elmi seminar keçirilib. Seminarda Əməkdar elm xadimi, fizika-riyaziyyat elmləri doktoru, professor Natiq Atakişiyev “5-ölçülü diskret Furye çevrilməsinin Nyuton bazisində məxsusi vektorları” mövzusunda məruzə ilə çıxış edib.
Professor Natiq Atakişiyev 5-ölçülü operatorun məxsusi qiymətlərinin və məxsusi vektorlarının tapılması üçün sadə analitik yanaşma təklif edildiyini bildirib. Bu yanaşma operator və onun kompleks qoşma cütünün diskret əksetmə operatoruna görə simmetriyasının mövcudluğuna əsaslanıb. Bu yeni yanaşma kəsilməz halda yaxşı məlum olan psi- funksiyasının diskret analoqu daxil edilməklə operator və onun kompleks qoşma cütü üçün yaradılıb. Kəsliməz halın psi-funksiyasının digər məlum ifadəsi əsasında isə məxsusi vektorların diskret analoqlarının aşkar şəkli, Nyuton bazis çoxhədlilərinin müəyyən funksiyaya olan hasili vahidlərində tapılıb.
Sonda məruzə ətrafında fikir mübadiləsi aparılıb və iştirakçıların sualları cavablandırılıb.
