AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Jurnalistika fakültəsinin rəhbərliyi və bir qrup tələbəsi Azərbaycan Dövlət İnformasiya Agentliyində (AZƏRTAC) olub.

AZƏRTAC-ın İdarə Heyətinin sədri Vüqar Əliyevlə görüşdə qonaqlara agentliyin tarixi, keçdiyi inkişaf yolu və fəaliyyət istiqamətləri barədə ətraflı məlumat verilib. Bir neçə gün əvvəl AZƏRTAC-ın 105 illik yubileyinin keçirildiyini bildirib: “1920-ci il martın 1-də Azərbaycan Xalq Cümhuriyyəti hökuməti tərəfindən əsası qoyulan ilk milli xəbər agentliyi mürəkkəb, çətin və şərəfli yol keçib. Təəssüf ki, Cümhuriyyət dövrünün yadigarı olan AZƏRTAC müstəqil xəbər mənbəyi kimi cəmi 58 gün yaşaya bilib. AXC-nin süqutundan sonra agentliyin 70 illik sovet dövründə adı 7 dəfə dəyişdirilib, xəbər yayımında ciddi məhdudiyyətlərlə üzləşib. Azərbaycan dövlət müstəqilliyini bərpa edəndən sonra agentliyin tarixi adı qaytarılıb. AZƏRTAC-ın əsl inkişaf dövrü Ulu Öndər Heydər Əliyevin Azərbaycanda hakimiyyəti illərində olub. Prezident İlham Əliyevin 2015-ci il fevralın 26-da imzaladığı Sərəncamla isə Azərbaycan Dövlət İnformasiya Agentliyi (AZƏRTAC) adlandırılıb”.

İdarə Heyətinin sədri qeyd edib ki, son illərdə AZƏRTAC 50-dən artıq xarici ölkənin xəbər agentliyi ilə əməkdaşlıq müqaviləsi imzalayıb, 5 qitədə fəaliyyət göstərən agentliklərlə informasiya mübadiləsi aparır. Diqqətə çatdırılıb ki, son illər AZƏRTAC-ın xəbər yayımı keyfiyyətcə yeni səviyyəyə yüksəlib. Gün ərzində agentliyin xəbər lentində 8 dildə (Azərbaycan, rus, ingilis, alman, fransız, ərəb, Çin və ispan) 500-dən artıq informasiya yerləşdirilir, eləcə də beş dildə videoxəbərlər yayılır. Eyni zamanda, AZƏRTAC-ın dünyanın 25-ə yaxın ölkəsində xarici müxbir məntəqələri fəaliyyət göstərir. Agentlik Azərbaycan həqiqətlərini planetin demək olar, bütün guşələrinə çatdırır, dünya miqyasında dürüst və qərəzsiz xəbər mənbəyi kimi qəbul edilir.

Həmçinin bildirilib ki, bu gün AZƏRTAC gənc jurnalistlər üçün əsl təcrübə məktəbinə çevrilib.

Bakı Dövlət Universitetinin (BDU) Jurnalistika fakültəsinin dekanı, dosent Vüqar Əliyev BDU-nun Medianın İnkişafı Agentliyi, Audiovizual Şura, Mətbuat Şurası da daxil olmaqla, müxtəlif media qurumları ilə səmərəli əməkdaşlığından söz açıb. O, Jurnalistika fakültəsində yaradılan media otaqlarının tələbə jurnalistlər üçün nəzəri biliklərin praktikada tətbiqi baxımından mühüm rolunun olduğunu vurğulayıb. Eyni zamanda, Jurnalistika fakültəsinin tələbələrinin ölkəmizin mötəbər media qurumlarında təcrübə keçdikləri diqqətə çatdırılıb.

Söhbət zamanı AZƏRTAC-ın BDU-da yaradılacaq xüsusi otağı barədə də danışılıb, bunun gənc jurnalistlər üçün təcrübə mübadiləsi baxımından önəmi qeyd olunub.

Müzakirələrlə davam edən görüşdən sonra BDU-nun Jurnalistika fakültəsinin nümayəndə heyəti AZƏRTAC-ın binasında yaradılan şəraitlə tanış olub.