Şanlı qələbəmizin başlanğıcı – tarixi Aprel döyüşlərindən 10 il ötür
Şanlı Zəfərə gedən yolun başlanğıcı olan Aprel döyüşlərindən 10 il keçir.
Bu, sadəcə Qələbənin ilk addımı deyildi. Bu döyüşlər 30 ilə yaxın işğalla barışmayan xalqın ümidinin cücərdiyi, dövlətin öz varlığını ortaya qoymasının sübutu idi. Bu döyüşlər həm də Vətən müharibəsində Qələbənin ilk sınağı idi – Azərbaycan dövləti, xalqı, əsgəri bu sınaqdan alnıaçıq çıxdı. Artıq torpaqlarımızın hərb yolu ilə azad ediləcəyinə heç kimin şübhəsi qalmadı. Qəhrəmanlığı ilə dünyada tanınan xalqımız tarixin hər dövründə öz haqqını özü müdafiə edib. Qəhrəman oğullarının qanı, canı bahasına qələbələrini tarixə qızıl hərflərlə yazıb.
“Biz işğal edilmiş torpaqlara qayıdacağıq. Bu, bizim əsas vəzifəmizdir. Necə ki, keçən il azad edilmiş torpaqlarda bu gün bayrağımız dalğalanır, hələ də işğal altında olan bütün başqa torpaqlarımızda da Azərbaycan bayrağı qaldırılacaqdır” – Prezident, Ali Baş Komandan İlham Əliyevin 2017-ci il martın 31-i Azərbaycan Ordusunun bir qrup hərbçisi ilə görüşündə ifadə etdiyi bu fikirlər 3 il sonrakı qələbənin proqnozu idi.
1994-cü ildə razılaşdırılmış atəşkəs rejimindən sonra Azərbaycan qoşunlarının təmas xəttində baş vermiş ən böyük hərbi qarşıdurma sayılan Aprel döyüşləri hələ o dövrdə qondarma rejimin “keçilməz” adlandırdığı istehkamları bir gün içində darmadağın etdi. 2016-cı il aprelin 1-dən 2-nə keçən gecə və gün ərzində Azərbaycan mövqelərinin və yaşayış məntəqələrinin Ermənistan silahlı qüvvələri tərəfindən güclü artilleriya atəşinə məruz qalmasının qarşılığında Azərbaycan Ordusunun bölmələri əks-həmlə ilə təxribatların qarşısını aldı.
Ordumuzun qələbəsi ilə nəticələnən döyüşlərdə Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Madagiz kəndi istiqamətində bəzi mövqelər düşməndən azad olundu. Aprelin 4-ü isə döyüşçülərimizin şücaəti ilə Ağdərə-Tərtər və Xocavənd-Füzuli istiqamətlərində mövqelərimizə qarşı yenidən cəhd edilən təxribatın qarşısı uğurla alındı.
Aprel ayının 4 günü ərzində bölmələrimiz tərəfindən yerinə yetirilən adekvat cavab tədbirləri nəticəsində düşmən ağır məğlubiyyətə uğradı, Ermənistan silahlı birləşmələrinin işğalı altında olan Füzuli, Cəbrayıl və Ağdərə rayonlarının 2 min hektardan çox hissəsi azad edildi, həmçinin minlərlə hektar strateji əhəmiyyətli ərazi Ordumuzun tam nəzarətinə keçdi.
Bu tarixi döyüşlərin məntiqi davamı isə nəyi, necə və nə vaxt etməyi uzaqgörən siyasəti ilə müəyyənləşdirən Müzəffər Ali Baş Komandan İlham Əliyevin 27 sentyabr 2020-ci ildə Ermənistan silahlı qüvvələrinin bütün cəbhəboyu törətdiyi genişmiqyaslı təxribatlara, Azərbaycan Ordusunun mövqelərinə və mülki yaşayış məntəqələrimizə endirdiyi atəş zərbələrinə cavab olaraq əks-hücum əməliyyatına - Vətən müharibəsinə başlaması əmrini verməsi oldu. 44 gün ərzində Azərbaycan 30 illik işğala son qoyaraq ərazi bütövlüyünü, 2023-cü ilin sentyabrında keçirilən 23 saatlıq uğurlu antiterror əməliyyatları nəticəsində isə suverenliyini bərpa etdi.
Şanlı Zəfərimizin davamı məntiqi uğurlarımızla möhkəm təməl üzərində inkişaf etməyə başladı. Belə ki, ötən il avqustun 8-də bütöv Azərbaycanın növbəti nailiyyəti “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis edilməsi haqqında Saziş"in ABŞ Prezidentinin iştirakı ilə paraflanması oldu.
Bu gün Qarabağ və Şərqi Zəngəzur yenidən canlanır. İnsanlar doğma yurdlarına qayıdır, irimiqyaslı quruculuq işləri həyata keçirilir. Qarabağa, Şərqi Zəngəzura köçən hər yeni ailə, orada dünyaya gələn hər körpə yeni həyatın, qalib millətin və bütöv Azərbaycanın simvoludur.
Müstəqillik və suverenlik milli sərvətimizdir. Bu yolda canını fəda edən şəhidlərimizin ruhu şad olsun!