Mexanika-riyaziyyat fakültəsində elmi seminar keçirilib
Bakı Dövlət Universitetinin (BDU) Mexanika-riyaziyyat fakültəsində keçirilən elmi seminarda fakültənin Riyazi analiz kafedrasının dosenti, fizika-riyaziyyat elmləri namizədi Vüqar Mehrabov “Bir ucunda elastik bərkidilmiş inersial yük olan Eyler-Bernulli çubuğunun əyilmə rəqslərinin məxsusi tezlik və harmonikərinin xassələri” mövzusunda məruzə ilə çıxış edib.
Seminarda bir ucu bərkidilmiş, digər ucunda isə c1 və c2 möhkəmliyi olan yaylarla elastik bərkidilmiş inersial yük olan Eyler-Bernulli çubuğunun əyilmə rəqslərini təsvir edən sərhəd şərtlərinə spektral parametr daxil olan dördüncü tərtib adi diferensial tənliklər üçün spektral məsələ müzakirə edilib. Baxılan məsələnin köklü alt fəzalarının strukturu, məxsusi funksiyalarının və onların törəmələrinin osillyasiya xassələri, məxsusi ədədləri və məxsusi funksiyaları üçün dəqiqləşdirilmiş asimptotik düsturlar, məxsusi funksiyalarının altsistemlərinin bazislik xassələri və bu altsistemlər üzrə spektral ayrılışlarının müntəzəm yığılması haqqında məlumat verilib.