“Əbədiliyə uzanan yol”
Bakı Dövlət Universitetinin (BDU) Coğrafiya fakültəsi və Tələbə Gənclər Təşkilatının (TGT) birgə təşkilatçılığı ilə Ümummilli Lider Heydər Əliyevin anadan olmasının 103-cü ildönümünə həsr olunmuş “Əbədiliyə uzanan yol” adlı tədbir keçirilib.
Əvvəlcə Dövlət himni səsləndirilib, Ümummilli Lider Heydər Əliyevin və Azərbaycanın ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad edilib.
Coğrafiya fakültəsinin dekanı, professor Məqsəd Qocamanov çıxış edərək bildirib ki, Ulu Öndər Heydər Əliyev müasir Azərbaycan dövlətçiliyinin memarı kimi ölkənin siyasi sabitliyinin, iqtisadi inkişafının və milli həmrəyliyinin əsasını qoyub. O qeyd edib ki, Ulu Öndərin uzaqgörən və praqmatik siyasəti nəticəsində Azərbaycan qısa müddətdə regionun aparıcı dövlətlərindən birinə çevrilib, beynəlxalq münasibətlər sistemində öz mövqeyini möhkəmləndirib. Ümummilli Liderin formalaşdırdığı dövlətçilik modeli bu gün Azərbaycan Respublikasının Prezidenti İlham Əliyev tərəfindən uğurla davam etdirilir və daha da zənginləşdirilir. Həyata keçirilən məqsədyönlü siyasət nəticəsində ölkənin sosial-iqtisadi inkişafı sürətlənib, beynəlxalq nüfuzu artıb, regionların davamlı inkişafı təmin olunub. Bu, Azərbaycanın gələcək inkişafı üçün möhkəm zəmin yaradır.
İqtisadi və sosial coğrafiya kafedrasının müdiri, professor Çingiz İsmayılov çıxış edərək Ulu Öndərin ölkənin iqtisadi və sosial inkişaf strategiyasının müəyyənləşdirilməsindəki xidmətlərindən bəhs edib. O qeyd edib ki, Ulu Öndər tərəfindən əsası qoyulan iqtisadi siyasət Azərbaycanın müstəqil və güclü dövlət kimi formalaşmasında mühüm rol oynayıb. Bildirilib ki, enerji strategiyası, infrastruktur layihələri və regionların inkişafına yönəlmiş proqramlar həmin siyasətin əsas istiqamətlərini təşkil edir. Hazırda Azərbaycan regionun lideri kimi öz mövqeyini möhkəmləndirir. Əldə olunan nailiyyətlər gənc nəslin qarşısında yeni imkanlar açır və onların bu inkişaf prosesində fəal iştirakını zəruri edir.
Sonda Ümummilli Liderin zəngin həyat və fəaliyyətini əks etdirən videoçarx nümayiş etdirilib.
