BDU və “ALCO” MMC-nin əməkdaşları arasında görüş
Bakı Dövlət Universitetinin (BDU) Karyera və məzunlarla iş Mərkəzi və “ALCO” MMC-nin əməkdaşları arasında görüş keçirilib.
Görüşdə Mərkəzin Karyera planlaşdırılması şöbəsinin müdiri Günel Qurbanova, baş mütəxəssisi İlkin Şərifov və “ALCO” MMC-nin Rəsmiləşdirmə şöbəsinin müdiri Sadiq Əsgərov iştirak ediblər.
Günel Qurbanova çıxışında Mərkəzin əsas məqsədinin tələbə və məzunların peşəkar inkişafına dəstək göstərmək, onların uğurlu karyera qurmasına şərait yaratmaq olduğunu qeyd edib. Bildirib ki, bu istiqamətdə müxtəlif layihə və proqramlar həyata keçirilir, işəgötürənlərlə əlaqələr genişləndirilir, eləcə də şirkətlərin təklif etdiyi vakansiya, təcrübə, təqaüd və könüllülük proqramları tələbə və məzunlara təqdim olunur.
“ALCO” MMC-nin nümayəndəsi isə şirkətin fəaliyyət istiqamətləri, insan resursları siyasəti və gənc mütəxəssislərin inkişafına yönəlmiş təşəbbüsləri barədə məlumat verib. O, tələbələrin real istehsalat prosesində iştirak etməklə praktiki bilik və bacarıqlara yiyələnəcəyini və bunun onların əmək bazarına hazırlıqlı şəkildə daxil olmasına şərait yaradacağını vurğulayıb.
Görüşdə BDU-nun Kimya, Beynəlxalq münasibətlər və İqtisadiyyat fakültələrinin tələbələri üçün təcrübə və təqaüd proqramlarının həyata keçirilməsi, eləcə də təcrübə proqramlarında fərqlənən tələbələrin gələcəkdə “ALCO” MMC-də işlə təmin olunması imkanları müzakirə edilib.
Sonda tərəflər gələcəkdə qarşılıqlı əməkdaşlığın daha da genişləndirilməsi, tələbələrin peşəkar inkişafına xidmət edən birgə layihələrin təşkil olunması barədə razılığa gəliblər.