BDU tələbələri qrant müsabiqəsinin qalibi olublar
Bakı Dövlət Universitetinin (BDU) tələbələri Azərbaycan Dövlət Neft və Sənaye Universiteti (ADNSU) ilə birgə əməkdaşlıq çərçivəsində Azərbaycan Respublikasının Prezidenti yanında Elmin İnkişafı Fondu tərəfindən təşkil edilmiş yerli qrant müsabiqəsi olan Gənc Alim və Tədqiqatçıların 6-cı qrant müsabiqəsinin qalibi olublar. Elmin İnkişafı Fondunun elan etdiyi müsabiqəyə “Kimya elmləri” sahəsi üzrə təqdim olunan layihələrdən ikisi yüksək qiymətləndirilib. Bunlardan biri BDU-nun Sənaye kimyası elmi-tədqiqat laboratoriyasının tələbələrinin və ADNSU-nun əməkdaşının təqdim etdiyi layihə olub.
Universitetin tələbələri “Yeni azometin əsaslı virus əleyhinə agentlərin dizaynı, Gaussian/Maestro proqramları ilə molekulyar səviyyədə tədqiqi və in vitro öyrənilməsi” mövzusunda layihə ilə müsabiqədə qalib olublar. Layihənin rəhbəri ADNSU-nun müəllimi, kimya üzrə fəlsəfə doktoru Nərminə Quliyevadır. Layihə heyətinə BDU-nun Sənaye kimyası elmi-tədqiqat laboratoriyasında elmi-tədqiqat işi yerinə yetirən magistrantlar Gültəkin Mehrəliyeva və Samirə İsmayılova, bakalavr tələbə Ruslan Quliyev daxildir.
Layihədə Ag və TiO2 nanohissəcikləri ilə modifikasiya olunmuş yeni azometinlər əsasında virus əleyhinə agentlərin dizaynı, in vitro öyrənilməsi və Gaussian/Maestro proqramları ilə molekulyar səviyyədə tədqiqi həyata keçiriləcəkdir. Layihə BDU-nun Sənaye kimyası elmi-tədqiqat laboratoriyasında və ADNSU-nun Neftin, Qazın Geotexnoloji Problemləri və Kimya Elmi-Tədqiqat İnstitutunda yerinə yetiriləcəkdir.