BDU tələbələri Heydər Əliyev Mərkəzinə ekskursiya ediblər

SOSİAL 12 Dekabr 2025 11:37

Bakı Dövlət Universitetinin (BDU) “BDU könüllüləri” təşkilatının Geologiya fakültəsi üzrə üzvləri Ümummilli Lider Heydər Əliyevin anım günü münasibətilə Heydər Əliyev Mərkəzinə ekskursiya ediblər.

Ekskursiyanın məqsədi tələbələrin Ulu Öndərin həyat və fəaliyyəti, Azərbaycan dövlətçiliyinin formalaşması və inkişafında oynadığı tarixi rol barədə biliklərini artırmaq, onları milli irs və mədəniyyətə daha da yaxınlaşdırmaq olub.

Tələbələr səfər zamanı Heydər Əliyevin zəngin siyasi irsini əks etdirən ekspozisiyalarla tanış olub, dövlətçilik tarixinin müxtəlif mərhələlərinə dair foto, video və arxiv materiallarını izləyiblər. Tələbələr Ümummilli Liderin dövlət quruculuğu, həyata keçirdiyi iqtisadi və siyasi islahatlar, eləcə də beynəlxalq arenadakı fəaliyyəti barədə məlumatlandırılıb.

Səfər zamanı Mərkəzin əməkdaşları iştirakçılara Heydər Əliyev Mərkəzinin yaranma tarixi, memarlıq xüsusiyyətləri və sərgilərin quruluş konsepsiyası barədə də geniş məlumat təqdim ediblər.