BDU rektoru Məşvərət Şurasının üzvləri ilə görüşüb
Bakı Dövlət Universitetinin (BDU) rektoru Elçin Babayev Universitetin Məşvərət Şurasının bir qrup üzvü ilə görüşüb.
BDU-nun rektoru Universitetin qocaman alimlərini 31 Dekabr – Dünya Azərbaycanlılarının Həmrəyliyi Günü və Yeni il münasibətilə təbrik edib, onlara işlərində və şəxsi həyatlarında uğurlar arzulayıb.
Rektor 2023-cü ilin Azərbaycan xalqı üçün çox əlamətdar olduğunu qeyd edib. 2023-cü il mayın 10-da Ümummilli lider, müstəqil Azərbaycan dövlətinin qurucusu, BDU-nun ən böyük məzunu Heydər Əliyevin anadan olmasının 100 ili tamam olur. Rektor Azərbaycan Respublikasının Prezidenti İlham Əliyevin Sərəncamı ilə 2023-cü ilin “Heydər Əliyev İli” elan olunmasının BDU alimləri qarşısında da çox mühüm vəzifələr qoyduğunu vurğulayıb. Ulu öndər Heydər Əliyevin zəngin həyat yolu və çoxşaxəli fəaliyyətinin hər bir azərbaycanlı üçün nümunə olduğunu, bu şərəfli ömrün bütün mərhələlərinin öyrənilməsinə böyük ehtiyac duyulduğunu diqqətə çatdırıb.
Daha sonra Məşvərət Şurası üzvlərinin “Heydər Əliyev İli” ilə əlaqədar təklifləri dinlənilib, BDU-da elm, tədris fəaliyyətinin gedişi müzakirə olunub.
