AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) rektoru Elçin Babayev Azərbaycan Dövlət Pedaqoji Universiteti (ADPU) ilə ABŞ-nin Corc Vaşinqton Universiteti arasında “Təhsilin idarə edilməsi” ixtisaslaşması üzrə ikili diplom proqramı çərçivəsində təhsil alan magistrantlarla görüşüb.

Görüş zamanı ali təhsilin inkişafı, təhsilin idarə edilməsində müasir yanaşmalar, universitetlərin strateji inkişaf prioritetləri, elmi-tədqiqat fəaliyyətinin təşviqi və beynəlxalq akademik əməkdaşlığın əhəmiyyəti ətrafında geniş fikir mübadiləsi aparılıb.

Rektor Elçin Babayev rəhbərlik etdiyi ali təhsil müəssisəsinin elmi-pedaqoji fəaliyyəti, beynəlxalq əlaqələrin genişləndirilməsi və təhsilin keyfiyyətinin yüksəldilməsi istiqamətində həyata keçirilən layihələr barədə məlumat verib. O, həmçinin müasir universitetlərin qarşısında duran əsas çağırışlara, ali təhsil müəssisələrinin qlobal akademik məkanda mövqeyinin gücləndirilməsinə və institusional inkişafda strateji idarəetmənin roluna toxunub.

Səmimi və interaktiv şəraitdə keçən görüşdə tələbələr universitetlərin idarə olunması və ali təhsilin gələcək perspektivləri ilə bağlı suallarını rektora ünvanlayıblar. Elçin Babayev magistrantların suallarını ətraflı cavablandıraraq öz təcrübəsini bölüşüb, onların fikir və mülahizələrini dinləyib.

Görüş tələbələrin ali təhsil müəssisələrinin idarə edilməsinə dair nəzəri biliklərini praktiki təcrübə ilə əlaqələndirməsi və universitet rəhbərliyinin strateji baxışları ilə tanış olması baxımından əhəmiyyətli olub.