BDU-nun tələbələri Milli Azərbaycan Tarixi və Azərbaycan İstiqlal Muzeylərini ziyarət ediblər
Bakı Dövlət Universitetinin Hüquq fakültəsinin Tələbə Gənclər Təşkilatının üzvü olan tələbələr Milli Azərbaycan Tarixi və Azərbaycan İstiqlal Muzeylərini ziyarət ediblər.
Ziyarət çərçivəsində İstiqlal muzeyinin zallarında nümayiş olunan Azərbaycan Respublikasının dövlət atributlarına, xanlıqlar dövrünə, XIX əsrin sonu - XX əsrin əvvəllərində Azərbaycanda baş vermiş hadisələrə, Azərbaycanın repressiya və İkinci Dünya müharibəsi illərindəki tarixinə, Qarabağ müharibəsinə, 20 Yanvar faciəsinə və respublikamızın müstəqillik dövrünə həsr olunmuş eksponatlar və Azərbaycanın görkəmli hərbçisi Səməd bəy Mehmandarov haqqında ətraflı məlumat verilib.
Bələdçi muzeydə 20 min eksponatın, onların sırasında nadir sənədlər, fotoşəkillər, numizmatik kolleksiyalar, bədii əsərlər və digər əşyaların olduğunu da qeyd edib.
Azərbaycan Milli Tarix Muzeyinə ziyarət edən tələbələrə tariximizin hər bir mərhələsi üçün səciyyəvi məna kəsb edən eksponatlar barəsində ətraflı məlumat verilib.
Ziyarətlər tələbələrin ümumi biliklərinin və dünyagörüşlərinin genişləndirilməsinə, onların maarifləndirilməsinə, Azərbaycanın tarixi, mədəniyyəti, Azərbaycan xalqının dəyərləri və adət-ənənələri haqqında dərin biliklərə yiyələnməsinə yönəlib.