BDU-nun nəzdində İqtisadiyyat və Humanitar Kollecdə Pedoqoji Şuranın iclası keçirilib
Bakı Dövlət Universitetinin nəzdində İqtisadiyyat və Humanitar Kollecdə cari tədris ilinin yekunları və yeni tədris ilinə hazırlıqla bağlı Pedoqoji Şuranın iclası keçirilib.
İclası giriş sözü ilə açan Kollecin direktoru professor Səhər Orucova cari tədris ilində imtahanların təşkili, yeni tədris ilinə hazırlıq və görüləcək işlər barəsində geniş çıxış edib.
Kollecin tədris işləri üzrə direktor müavini İradə Xudiyeva hesabat verərək bildirib ki, dərslərin onlayn formada keçirilməsinə baxmayaraq, tələbələr arasında mənimsəmənin yüksək olduğunu, müəllimlərin müasir tədris metodlarından istifadə edərək bu dərs formasına tez inteqrasiya etdiklərini nəzərə çatdırıb. Direktor müavini Kollecdə Münaqişə Komissiyası və İmtahan Qərargahının yaradıldığını, qiymətindən narazı qalan tələbələrin bu komissiyaya müraciət etdiyini də qeyd edib. Qiymətləndirmə və monitorinq şöbəsinin müdiri Afaq Malıyeva Kollecin builki 297 məzunundan 28 nəfərinin fərqlənmə diplomu ilə bitirdiyini bildirib və Kollecdə yay məktəbinin fəaliyyət göstərəcəyini, akademik borcu qalan tələbələrin bura cəlb olunmasının vacibliyini diqqətə çatdırıb. İclasda qərara alınıb ki, akademik borcu qalan tələbələrin yay məktəbinə cəlb olunmaları təmin edilsin.
Daha sonra Kollecin tərbiyə işləri üzrə direktor müavini Gülnarə Həsənovanın hesabatı dinlənilib. O, tədbirlərin onlayn keçirildiyini və tələbələrin tədbirlərə fəal qoşulduqlarını, davamiyyətə ciddi riayət etdiklərini qeyd edib.