BDU-nun Jurnalistika fakültəsinin professoru Nəsir Əhmədli vəfat edib
Bakı Dövlət Universitetinin (BDU) Jurnalistika fakültəsinin professoru, əməkdar jurnalist Nəsir Əhmədli uzun sürən ağır xəstəlikdən sonra iyunun 7-də dünyasını dəyişib.
Nəsir Əhmədli 1 iyul 1942-ci ildə Tovuz rayonunun Alakol kəndində anadan olub. 1971-ci ildə BDU-nun jurnalistika fakültəsini bitirib.
1981-ci ildə namizədlik dissertasiyasını müdafiə edib.
2007-ci ildə "Azərbaycan Beynəlxalq Radiosunun Yaxın və Orta Şərq ölkələrinə yayımı: tarix, təcrübə, nəzəriyyə" mövzusunda doktorluq dissertasiyası müdafiə edib.
2016-cı il Mirzə Cəlil Media Mükafatına layiq görülüb. Müxtəlif illərdə V.Sturua adına Bakı Gəmi Təmiri Zavodunda, Azərbaycan Dövlət Televiziyasında çalışıb.
2004-cü ildən Beynəlxalq jurnalistika və informasiya siyasəti kafedrasında işləyib.
100-ə yaxın məqalənin, 3 monoqrafiyanın, 5 dərs vəsaitinin, 10 kitabın müəllifidir.
10-a yaxın elmlər namizədinə rəhbərlik edib, 1 elmlər doktorunun, 1 elmlər namizədinin rəsmi opponenti olub.
Beynəlxalq radio yayımının jurnalistikanın bütün sahələrinə tətbiq edilə biləcək model-sxemini hazırlayıb, bu sahədə fəaliyyət göstərən 6 qayda aşkarlayıb.
"Jurnalistin nitq mədəniyyəti” kitabına görə "Media açarı-2006” mükafatına, 3-cü dərəcəli "Əmək ordeni"nə, Ali Media Mükafatına, müxtəlif diplom və fəxri fərmanlara layiq görülüb.
Allah rəhmət eləsin!