BDU-nun Hüquq fakültəsində “Narkotik haqqında həqiqətləri öyrənək” mövzusunda Respublika elmi-praktiki seminarı keçirilib
Bakı Dövlət Universitetinin (BDU) Hüquq fakültəsinin təşkilatçılğı ilə Azərbaycan Respublikası Prezidentinin 2019-cu il 22 iyul tarixli 1334 nömrəli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nın həyata keçirilməsi üzrə və 26 iyun “Narkotik vasitələrin sui-istifadəsi və qanunsuz dövriyyəsi ilə Beynəlxalq Mübarizə Günü” ilə əlaqədar “Narkotik haqqında həqiqətləri öyrənək” mövzusunda Respublika elmi-praktiki seminarı keçirilib.
Hüquq fakültəsinin dekanı Əmir Əliyev mövzunun əhəmiyyətindən danışaraq bildirib ki, narkotik vasitələrin və psixotrop maddələrin qanunsuz dövriyyəsi ilə mübarizə sahəsində əsas istiqamətlərdən biri də təhsil müəssisələrində yeniyetmə və gənclərin məlumatlandırılması üçün davamlı olaraq maarifləndirmə işlərinin aparılması, onların antinarkotik dünyagörüşünün formalaşdırılmasıdır. Ə.Əliyev qeyd edib ki, 26 iyun Azərbaycan Silahlı Qüvvələri Günü kimi bayram edilir və bu il II Qarabağ müharibəsində qələbə sevincini bizə bəxş edən Azərbaycan Respublikasının müzəffər Silahlı Qüvvələrinin gününü xüsusi təntənə və ən əsası qürur hissi ilə Ali Baş Komandana, qəhraman şəhid və qazilərimizə minnətdarlıqla qeyd etdik. Əmir Əliyev vurğulayıb ki, hüquqşünaslar üçün 26 iyun tarixi “Narkomaniyaya və Narkobiznesə qarşı Beynəlxalq Mübarizə Günü” kimi də beynəlxalq aləmdə qeyd edilir və bugünkü vebinar xüsusi olaraq məhz bu günün ərəfəsində keçirilir.
Cinayət hüququ və kriminologiya kafedrasının müdiri Şəhla Səmədova bildirib ki, artıq üçüncü dəfədir ki 2020/2021-ci tədris ilində BDU-da artıq, “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nın həyata keçirilməsi ilə əlaqədar elmi-praktiki seminar keçirilir. Hüquq fakültəsində magistratura səviyyəsinin transmilli cinayət hüququ ixtisaslaşmasında “Narkotik vasitələrin və psixotrop maddələrin qanunsuz dövriyyəsi ilə mübarizə” əsas fənlərdən biri olaraq tədris olunduğunu bildirib.
Daha sonra vebinarda Respublika Narkoloji Mərkəzinin psixoloqu Ramin Allahverdiyev “Psixoaktiv maddə asılılığının yaranma səbəbləri və aradan qaldırılması yolları”, Azərbaycan Respublikası Narkomanlığa və narkotik vasitələrin qanunsuz dövriyyəsinə qarşı mübarizə üzrə Dövlət Komissiyasının işçi qrupunun məsul əməkdaşı Vasif Quliyev “Azərbaycan gəncliyi narkotiklərə yox deyir”, Azərbaycan Respublikası Daxili İşlər Nazirliyinin Narkotiklərlə Mübarizə Baş idarəsinin əməkdaşı Nadir Məmmədov “Müasir dövrdə narkotik vasitələrin və psixotrop maddələrin qanunsuz dövriyyəsinə qarşı mübarizədə polis orqanlarının rolu”, BDU-nun Cinayət hüququ və kriminologiya kafedrasının əməkdaşları Aynurə Musayeva “Narkotik vasitələrin və psixotrop maddələrin qanunsuz dövriyyəsi ilə cinayət-hüquqi mübarizənin istiqamətləri ” və Orxan Aslanov “Latın Amerika ölkələrində narkomaniya və narkotizmlə mübarizə: Kolumbiya və Meksika təcrübəsi” mövzusunda çıxış ediblər.
Məruzəçilər Azərbaycan Respublikasının narkomaniya və narkobiznesə qarşı mübarizədə həyata keçirdiyi tədbirlər və onların nəticələri, narkomanlığın cəmiyyətə və insan sağlamlığına ziyanı, narkomanlığın ilkin profilaktikası, qüvvədə olan cinayət qanunvericiliyinin təkmilləşdirilməsi, xarici dövlətlərin qanunvericilik təcrübəsi və s. məsələlər haqqında danışıblar. Sonda Cinayət hüququ və kriminologiya kafedrasının dosenti Məleykə Bayramova vebinarın gənc hüquqşünaslarına müraciət edərək onları antinarkoloji təbliğat və maarifləndirmə istiqamətində həyata keçirilən tədbirlərin aktiv iştirakçıları olmağa çağırıb.