AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) İnformasiya və sənəd menecmenti fakültəsində 27 Sentyabr – Anım Günü münasibətilə fakültənin məzunu, Vətən müharibəsi qazisi Sərxan Veysəlli ilə görüş keçirilib.

Əvvəlcə Ulu Öndər Heydər Əliyevin və torpaqlarımızın azadlığı uğrunda şəhid olmuş soydaşlarımızın əziz və unudulmaz xatirələri bir dəqiqəlik sükutla yad edilib. Tədbirin moderatoru, İnformasiya və sənəd menecmenti fakültəsinin dosenti Rəşad Qardaşov 2020-ci ilin 27 sentyabrında başlayan və parlaq qələbə ilə nəticələnən 44 günlük Vətən müharibəsinin tarixi əhəmiyyətindən bəhs edib. Tədbirə dəvət olunmuş Sərxan Veysəllinin döyüş yolu haqqında iştirakçılara geniş məlumat verib.

Vətən müharibəsi qazisi – Azərbaycan Respublikasının Prezidenti İlham Əliyevin müvafiq sərəncamları ilə “Füzulinin azad olunmasına görə” və “Kəlbəcərin azad olunmasına görə” medalları ilə təltif olunmuş Sərxan Veysəlli işğalçı qüvvələrə qarşı aparılan hərbi əməliyyatlar barədə danışıb, döyüş təəssüratlarını görüş iştirakçıları ilə bölüşüb. O, Prezident, Silahlı Qüvvələrin Müzəffər Ali Baş Komandanı İlham Əliyevin yenilməz sərkərdəliyi, xalqımızın birliyi, şəhid və qazilərin qanı və canı hesabına Vətən torpaqlarının düşmən işğalından azad edilməsinin çoxəsrlik tariximizin parlaq səhifəsi olduğunu vurğulayıb. Müzəffər Ordumuzun uğurlu hərbi əməliyyatları nəticəsində Azərbaycan bayrağının 30 ildən artıq işğalda qalmış ərazilərimizdə dalğalandırılmasının hər birimizdə sonsuz qürur hissləri yaratdığını bildirib: “Şükürlər olsun ki, bu gün məzunu olduğum doğma Universitetimə, doğma fakültəmə Zəfər qazanmış ordunun qalib əsgəri kimi gəlmişəm”.

BDU-nun Redaksiya-nəşriyyat işi kafedrasının müdiri, Birinci Qarabağ müharibəsinin veteranı Knyaz Aslan Ermənistanın işğalçılıq siyasəti, artıq tarixdə qalmış Qarabağ münaqişəsinin başvermə səbəbləri, müharibənin qurbanları, ağır nəticələri barədə tələbələrə informasiya verib. Qarabağ münaqişəsinin həlli istiqamətində əməli addımların atılmasına məhz xalqımızın Ümummilli Lideri Heydər Əliyevin Azərbaycanda siyasi hakimiyyətə qayıdışından sonra başlandığını xüsusi vurğulayıb. Tarixi Zəfər nəticəsində bütün şəhidlərimizin qisasının alındığını, onların ideallarının qalib gəldiyini bildirən natiq Vətənimizin azadlığı, torpaqlarımızın bütövlüyü uğrunda canlarını fəda edən şəhidlərimizin əziz xatirələrinin hər zaman xalqımız tərəfindən yaşadılacağını diqqətə çatdırıb.