BDU-da "Ornitoloji problemlərin ekoloji aspektləri" mövzusunda dəyirmi masa
Dəyirmi masada fakültə rəhbərliyi, Zoologiya və fiziologiya kafedrasının əməkdaşları, gənc tədqiqatçılar və magistrantlar iştirak ediblər. Fakültənin dekanı, professor Afət Məmmədova ölkənin ən məşhur təbiətşünası, biologiya elmləri doktoru, professor Qara Mustafayevin biologiya elminə verdiyi töhfələr haqda danışıb, onun fəaliyyətinin gənc bioloqlara örnək olduğunu deyib.
Zoologiya və Fiziologiya kafedrasının müdiri, dosent Əbülfəz Tağıyev Qara Mustafayevin iştirakı ilə çəkilən “Təbiəti sevənlər” verilişindən fraqmentlər əsasında alimin həyat və fəaliyyəti barədə məlumat verib.
Daha sonra Azərbaycanda ornitologiyanın müasir vəziyyəti, ətraf mühit dəyişkənliklərinin quşların növ müxtəlifliyinə təsiri və s. məsələlər ətrafında müzakirələr aparılıb.
Dəyirmi masada Qara Mustafayevin yetirmələri Nərminə Sadıqova, Sevinc Hümbətova, Anar Məmmədov, Canbaxış Nəcəfov, Aftandil Musayev, Çingiz Məmmədov, Sevinc Məmmədova gənc doktorant və magistrantlar qarşısında ornitologiyanın müasir problemləri və ekoloji aspektləri barədə çıxışlar ediblər.
Kafedranın əməkdaşları həmçinin Qara Mustafayevin Kürdəmir rayonunun Dəyirmanlı kəndindəki məzarını ziyarət ediblər.
