AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetində (BDU) Novruz bayramı münasibətilə tədbir keçirilib.

Mərasimdə çıxış edən BDU rektoru Elçin Babayev Universitet əməkdaşlarını təbrik edib, onlara uğurlar arzulayıb. Rektor bildirib ki, Novruz əsrlər boyu milli-mənəvi dəyərlərimizi, adət-ənənələrimizi və birlik ruhumuzu yaşadan müqəddəs bir bayramdır. Bu bayram təbiətin oyanışını, həyatın yenidən canlanmasını, ümidin və yeniliyin başlanğıcını simvolizə edir. Novruz yalnız mövsüm dəyişikliyi deyil, həm də insanların mənəvi cəhətdən yenilənməsi, saflaşması və gələcəyə daha böyük inamla baxmasının rəmzidir. Bu gün Azərbaycan dövləti öz milli dəyərlərinə sadiq qalaraq dinamik inkişaf yolu ilə irəliləyir, beynəlxalq aləmdə mövqeyini daha da gücləndirir: “Belə bir inkişaf mərhələsində Novruz bayramı bizim üçün yalnız ənənə deyil, həm də milli kimliyimizin qorunması, zəngin mədəni irsimizin yaşadılması və gələcək nəsillərə ötürülməsi baxımından xüsusi əhəmiyyət daşıyır. 2026-cı ilin ölkəmizdə “Şəhərsalma və Memarlıq İli” elan olunması da yenilənmə, quruculuq və davamlı inkişaf ideyalarının təntənəsidir. Tarix boyu Azərbaycan xalqının görkəmli ziyalıları, alimləri və mütəfəkkirləri Novruz bayramına xüsusi ehtiramla yanaşıb, onun fəlsəfi və mənəvi dərinliyini yüksək qiymətləndiriblər. Bu bayramın rəsmi status alması müstəqil dövlətimizin mühüm nailiyyətlərindən biridir. Multikultural dəyərlərin və tolerantlıq ənənələrinin güclü olduğu ölkəmizdə Novruz bayramı müxtəlif mədəniyyətlərin harmoniyasını və ümumbəşəri dəyərlərin vəhdətini əks etdirir. Novruz adət-ənənələrində xalqımızın müdrikliyi, humanizmi və yüksək əxlaqi keyfiyyətləri aydın şəkildə öz əksini tapır. Bu bayram insanları bir araya gətirir, ailə və cəmiyyət bağlarını möhkəmləndirir, qarşılıqlı hörmət və etimadı gücləndirir”.

Rektor diqqətə çatdırıb ki, artıq xalqımız Novruz bayramını daha böyük qürur və sevinc hissi ilə qeyd edir: “Artıq bir neçə ildir ki, işğaldan azad olunmuş torpaqlarımızda Novruz tonqalları alovlanır, doğma yurd yerlərimizdə bayram şənlikləri keçirilir. Bu, xalqımızın tarixi qələbəsinin, milli birliyinin və sarsılmaz iradəsinin parlaq təzahürüdür. Qarabağdan ucalan Novruz tonqalları bu gün həm də dirçəlişin, yenidənqurmanın və parlaq gələcəyimizin rəmzinə çevrilib”.

Koreya Respublikasının ölkəmizdəki fövqəladə və səlahiyyətli səfiri Kang Kymgu Azərbaycanın ən gözəl bayramlarından birini BDU tələbələri ilə qeyd etməkdən sevinc duyduğunu bildirib. Səfir qeyd edib ki, Novruz Azərbaycan mədəniyyətini, ənənələrini təmsil edən bir bayramdır: “Bu dövrdə dünya çox sürətlə dəyişir. Dəyişən dünyada belə ənənələri yaşadan gəncləri görmək çox xoşdur. Bu, sizin qəlbinizdə azərbaycançılıq hisslərini daha da gücləndirəcək. Azərbaycanda həm müxtəliflik hökm sürür, həm də ənənələrə güclü bağlılıq var. Bu baxımdan Azərbaycanla Koreya oxşardırlar. Sizə Azərbaycan-Koreya əlaqələrini daha da inkişaf etdirməyi, sağlam, xoşbəxt olmağı, ölkənizin inkişafına töhfə verməyinizi arzulayıram”.

BDU-nun Filologiya fakültəsinin dosenti Kəmalə İslamzadə çıxışında Novruzun tarixi, adət-ənənələri, türk xalqlarının etnoqrafiyasında, mifik dünyagörüşündə yeri haqqında geniş məlumat verib, bu bayramın milli-mənəvi dəyərlər sistemimizdə özünəməxsus rola malik olduğunu qeyd edib.

Sonda BDU-nun Mədəniyyət-Yaradıcılıq Mərkəzinin hazırladığı bədii kompozisiya nümayiş olunub.