BDU-da Əməkdar jurnalist Elçin Alıoğlu ilə görüş
Bakı Dövlət Universitetinin (BDU) Jurnalistika fakültəsində “Trend” İnformasiya Agentliyinin baş direktorunun müavini, Əməkdar jurnalist, siyasi şərhçi Elçin Alıoğlu ilə görüş keçirilib.
Fakültənin dekanı, professor Vüqar Zifəroğlu Elçin Alıoğlunun jurnalistika sahəsindəki zəngin təcrübəsi və peşəkarlığı barədə tələbələri məlumatlandırıb.
Daha sonra çıxış edən Elçin Alıoğlu jurnalistikada illər ərzində topladığı təcrübələrdən danışıb. O, medianın mövcud vəziyyətinə nəzər salaraq, peşə etikası, obyektivlik prinsipi və jurnalistin ictimai məsuliyyəti kimi önəmli mövzulara toxunub.
Əməkdar jurnalist informasiya müharibələrinin və dezinformasiyanın artdığı müasir dövrdə jurnalistlərin daşıdığı məsuliyyətin daha da aktuallaşdığını vurğulayıb.
Qonaq tələbələrə araşdırma bacarıqlarını inkişaf etdirməyi, öz üzərlərində fasiləsiz işləməyi və müasir medianın çağırışlarına cavab verməyi tövsiyə edib.