BDU-da “Çovdar filiz sahəsinin geoloji-geofiziki materiallar əsasında tədqiqi” mövzusunda elmi seminar keçirilib
Bakı Dövlət Universitetinin (BDU) Geologiya fakültəsində “Çovdar filiz sahəsinin geoloji-geofiziki materiallar əsasında tədqiqi” mövzusunda elmi seminar keçirilib. Elmi seminarda fakültənin professor-müəllim heyəti, magistrant və doktorantları iştirak edib.
Seminarda Kompleks geoloji-geofiziki tədqiqatlar ETL-in böyük elmi işçisi, professor Nazim İmamverdiyev “Çovdar filiz sahəsinin geoloji-geofiziki materiallar əsasında tədqiqi” mövzusunda məruzə ilə çıxış edib. Məruzəçi Çovdar qızıl yatağının geoloji quruluşu, onu təşkil edən süxurların petrogeokimyəvi xüsusiyyətləri, yataqdakı filizlər, onların tərkibi, 3D formasında filiz kütləsinin forması və əmələgəlmə məsələləri haqqında seminar iştirakçılarına məlumat verib
Seminarda qeyd edilib ki, Çovdar filiz sahəsində aparılan geoloji-geofiziki tədqiqatların, dağ qazmalarının, buruq quyularının sınaqlaşdırılması ilə aparılan analizlərin nəticəsi bu rayonun potensial perspektivli olduğunu göstərir. Buna sübut son zamanlar filiz rayonunda yeni Sarıyoxuş və Mərəh yataqlarının kəşf olunmasıdır.
Sonra məruzə ətrafında müzakirələr aparılıb.
