BDU-da "Aşkar xətti çoxaddımlı üsullarda P-dayanıqlılıq" mövzusunda beynəlxalq elmi seminar keçirilib
Bakı Dövlət Universitetinin (BDU) Tətbiqi Riyaziyyat Elmi-Tədqiqat İnstitutunda 27 Mart – Azərbaycan Respublikasında “Elm günü” ilə bağlı beynəlxalq elmi seminar keçirilib.
Seminarda Marağa Universitetinin Riyaziyyat bölməsinin professoru Ali Şokri "Aşkar xətti çoxaddımlı üsullarda P-dayanıqlılıq" mövzusunda məruzə edib.
Məruzədə qeyri-xətti və ya ən çox P-dayanıqlılıq olan bir neçə aşkar P-dayanıqlılıq üsulunun yaradılması qeyd olunub. Məruzəçi bildirib ki, xətti çoxaddımlı P-dayanıqlılıq üsullar aşkar ola bilməz, onlar qeyri-aşkar olmalıdır. Qeyri-aşkarlıq P-dayanıqlılığın mühüm xüsusiyyətini əldə etmək üçün vacib şərtdir. İlk dəfə olaraq ikinci dərəcəli adi diferensial tənliklərin başlanğıc qiymət məsələlərinin ədədi həlli üçün aşkar xətti ikiaddımlı sinqulyar P-dayanıqlılıq üsulların yeni ailəsi yaradılıb.Yeni ailənin köməyi ilə alınan ədədi nəticələr onun effektivlik, dəqiqlik, yaxınlaşma və dayanıqlıq baxımından üstünlüyünü göstərir.
Hibrid formada keçirilən seminarda BDU-nun əməkdaşları ilə yanaşı, Türkiyə, İran və Azərbaycanın müxtəlif universitetlərinin alim və tədqiqatçıları iştirak ediblər.
Məruzədən sonra seminar diskussiya şəklində davam edib, məruzəçi ona verilən sualları cavablandırıb.