“Altayşünaslıq kontekstində yapon dili feilinin lüğət formasının funksional-semantik xüsusiyyətləri” mövzusunda elmi seminar
Bakı Dövlət Universitetinin Şərqşünaslıq fakültəsində “Altayşünaslıq kontekstində yapon dili feilinin lüğət formasının funksional-semantik xüsusiyyətləri” mövzusunda elmi seminar keçirilib.
Uzaq Şərq dilləri və ədəbiyyatı kafedrasının müdiri Oqtay Cəlilbəyli mövzu ilə bağlı təqdimatla çıxış edib.
Oqtay Cəlilbəyli məruzəsində altayşünaslıq kontekstində Azərbaycan və yapon dillərinin materialları əsasında feilin lüğət formasının qrammatik və funksional-semantik xüsusiyyətlərindən bəhs edib. O, yapon dilində feilin lüğət formasının özündə məsdər və indiki-gələcək zamanı ehtiva etməsinin Avropa, o cümlədən türk dilçiliyi ilə müqayisədə fərqləndiyini vurğulayıb.
Məruzəçi təqdimatın sonunda linqvistik araşdırmalarının nəticəsini cədvəl və sxemlərlə təqdim edib.
Tədbir mövzu ətrafında müzakirələrlə davam edib.