BDU-da elmi seminar: “Karbon kredit bazarı və mümkün imkanlar”
Bakı Dövlət Universitetinin (BDU) Tədqiqat, İnkişaf və İnnovasiyalar üzrə Mükəmməllik Mərkəzinin Nanoaraşdırmalar elmi-tədqiqat laboratoriyası tərəfindən “Karbon kredit bazarı və mümkün imkanlar” mövzusunda elmi seminar keçirilib. Seminarda laboratoriyanın elmi işçisi Kim Jiseok və kiçik elmi işçisi Orxan Güləhmədov məruzə ilə çıxış ediblər.
Orxan Güləhmədov müasir dövrdə qlobal miqyasda qarşıya çıxan ən mühüm problemlərdən biri olan iqlim dəyişikliyi və enerji böhranı barədə ətraflı məlumat verib. O, atmosferə buraxılan istixana qazlarının, xüsusilə də karbon qazının (CO₂) miqdarının artmasının ekosistemlərə, insan sağlamlığına və iqtisadi sistemlərə mənfi təsir etdiyini vurğulayıb. Bildirilib ki, bu problemin aradan qaldırılması üçün beynəlxalq səviyyədə mühüm təşəbbüslər həyata keçirilir, o cümlədən karbon emissiyalarının azaldılması məqsədilə müxtəlif texnoloji və iqtisadi mexanizmlər tətbiq olunur.
Kim Jiseok karbon kredit bazarının mahiyyəti, bu mexanizmin necə fəaliyyət göstərdiyi, karbon emissiyalarının azaldılması qarşılığında müəssisələrə və ölkələrə verilən kreditlərin iqtisadi dəyəri barədə danışıb. Məruzədə karbon kredit sisteminin əsas prinsipləri, onun tətbiq edildiyi qabaqcıl ölkələr – xüsusilə Avropa İttifaqı, Yaponiya, Kanada və Cənubi Koreya kimi ölkələrdə əldə olunmuş nəticələr barədə konkret nümunələr təqdim edilib. Bununla yanaşı, karbon qazının azaldılmasının ölçülməsi və qiymətləndirilməsi üçün istifadə olunan beynəlxalq standartlar və texniki meyarlar da seminar iştirakçılarının diqqətinə çatdırılıb.
Məruzəçilər həmçinin 2024-cü ildə Bakıda keçirilmiş BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) ölkəmiz üçün yaratdığı yeni imkanlardan söz açılıb. COP29-dan sonra Azərbaycanda karbon emissiyalarının tənzimlənməsi və karbon vergi sisteminin tətbiqi istiqamətində ciddi addımların atılmasının gündəmə gəldiyi, bu baxımdan elmi-tədqiqat müəssisələrinin və universitetlərin bilik və təcrübə potensialının artırılması, sənaye ilə əməkdaşlıq əlaqələrinin gücləndirilməsi və maarifləndirmə tədbirlərinin təşkilinin xüsusi əhəmiyyət daşıdığı vurğulanıb. BDU-nun Nanoaraşdırmalar elmi-tədqiqat laboratoriyasında həyata keçirilən tədqiqatların nəticələrinin sənayedə tətbiqi karbon emissiyalarının azaldılması ilə yanaşı, ölkəmizdə karbon kredit bazarının formalaşmasına və inkişafına töhfə verə bilər. Məruzəçilər bu məqsədlə gələcəkdə dövlət qurumları, özəl sektor və akademik dairələr arasında koordinasiyalı əməkdaşlığın da zəruri olduğunu bildiriblər.
Seminarın sonunda iştirakçıların mövzu ilə bağlı sualları cavablandırılıb.
