BDU-nun FPİ baş elmi işçisi, f.e.d., dosent Larisa İsmayılovanı yubileyi münasibətilə təbrik edirik!
Larisa İsmayıl qızı İsmayılova 8 dekabr 1952-ci ildə Bakı şəhərində qulluqçu ailəsində anadan olmuşdur. 1960-1970-ci illərdə Bakı şəhərində 47 saylı məktəbi qızıl medalla qurtarmışdır. 1970-ci ildə BDU-nun Fizika fakültəsinə daxil olmuşdur. O eyni zamanda 11 illik musiqi məktəbində təhsil almış, pianinoda ifasına görə Zaqafqaziyanın gənc musiqiçilərinin festivalının laureatı olmuşdur. İsmayılova L.İ. 1972-ci ildə musiqi məktəbini bitirmiş və keçmiş Azərbaycan Dövlət Konservatoriyasına daxil olmuşdur, lakin fizika fakültəsinin əlaçı tələbəsi olduğu üçün universitetdən çıxmasına icazə verilməmişdir. Larisa xanımın həyatında ən maraqlı hadisələrdən biri isə 1972-ci ildə Azadlıq meydanında Dövlət tədbirlərin birində Azərbaycan gəncləri adından çıxış etdikdən sonra Ümummilli Lider Heydər Əliyev tərəfindən təşəkkür edilməsi olub. Larisa xanım 1975-ci ildə BDU-nu fizik, fizika müəllimi ixtisasları üzrə fərqlənmə diplomu ilə bitirmiş, Lenin təqaüdçüsü olmuşdur. Beşinci kursda diplom işi yerinə yetirmək üçün SSRİ EA Bioüzvi Kimya İnstitutuna göndərilmişdir. 1975-1978-ci illərdə SSRİ EA Bioüzvi Kimya İnstitutunda məqsədli aspirant olmuşdur. 1979-cu ildə Moskva Dövlət Universitetində dissertasiya müdafiə edərək "Biofizika" ixtisası üzrə fizika-riyaziyyat elmləri namizədi elmi dərəcəsini almışdır. 1987-ci ildə dosent elmi adını alıb. 2009-cu ildə doktorluq dissertasiya müdafiə edərək "Molekulyar fizika" ixtisasında fizika elm sahəsi üzrə "Elmlər doktoru" elmi dərəcəsini almışdır.
1979-1980-ci illərdə BDU-nun “Molekulyar Biofizika“ elmi tədqiqat laboratoriyasında kiçik elmi işçi, 1980-1989-cu illərdə həmin laboratoriyada böyük elmi işçi, 1999-2005-ci illərdə aparıcı elmi işçi, 2005-2010-cu illərdə Fizika Problemləri Elmi-Tədqiqat İnstitutunun Nəzəri Fizika şöbəsində aparıcı elmi işçi, 2010-2019-cu illərdə baş elmi işçi vəzifələrində çalışıb. 2019-cu ildən BDU-nun Fizika Problemləri Elmi-Tədqiqat İnstitutunun Biofizika şöbəsində baş elmi işçi vəzifəsində çalışır. Respublika və xarici ölkələrin elmi mətbuatında dərc olunmuş 200-dən çox elmi əsərin və 1 dərs vəsaitinin müəllifidir.
BDU-nun Fizika Problemləri İnstitutunun kollektivi Əziz həmkarımızı, istedadlı alim və sevimli dost Larisa İsmayıl qızı İsmayılovanı, Yubileyi münasibəti ilə ürəkdən təbrik edir, ona möhkəm can sağlığı, uzun mənalı həyat və yeni elmi nailiyyətlər arzulayır!