BDU-da "Liderlik nədir? - yeni nəsil yanaşma" mövzusunda tədbir keçirilib
Bakı Dövlət Universitetində (BDU) “BDU könüllüləri” təşkilatı və “AIESEC Azərbaycan” beynəlxalq gənclər təşkilatının birgə təşkilatçılığı ilə "Liderlik nədir? - Yeni nəsil yanaşma" adlı tədbir keçirilib.
BDU-nun Humanitar məsələlər və gənclər siyasəti şöbəsinin müdiri Ramin Səmədov Universitetdə həyata keçirilən sosial layihələrdən, xüsusilə də "BDU könüllüləri" təşkilatının tələbələrin sosial fəallığının artırılmasında önəmli rolundan bəhs edib. O, “AIESEC Azərbaycan” təşkilatının gənclər arasında liderlik bacarıqlarının üzə çıxarılması və qlobal düşüncə tərzinin formalaşdırılması baxımından əhəmiyyətli rol oynadığını vurğulayıb.
Beynəlxalq münasibətlər və iqtisadiyyat fakültəsinin müəllimi Vəfa İsmayılova liderlik anlayışı, yeni nəsil liderlərin malik olmalı olduqları əsas keyfiyyətlər, gənclərin bu yolda qarşılaşdıqları fürsətlər və çətinliklər barədə məlumat verib.
“AIESEC Azərbaycan”ın marketinq və ictimaiyyətlə əlaqələr üzrə komitə sədri Nazənin Məmmədli gənclərin liderlik bacarıqlarını reallaşdırmaq üçün qlobal platformanın praktiki təcrübə və sosial layihələrdə iştirak imkanı yaratdığını qeyd edib.
“BDU könüllüləri” təşkilatının sədr müavini Rüstəm Əliyev təşkilatlararası tərəfdaşlıq sayəsində reallaşdırılan layihələrin gənclərin fərdi və ictimai inkişafına töhfə verdiyini bildirib.
Sonda tələbələrin sualları cavablandırılıb.
