BDU-da əmək bazarında yeni çağırışlara dair “workshop”
Bakı Dövlət Universitetində (BDU) Karyera Festivalı çərçivəsində Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyi, BDU Tələbə Həmkarlar İttifaqı Komitəsi, Karyera və məzunlarla iş Mərkəzi və "BDU könüllüləri" təşkilatının birgə təşkilatçılığı ilə “Əmək bazarında yeni çağırışlar” adlı “workshop” keçirilib.
Dövlət Məşğulluq Agentliyinin Mərkəzi karyera filialının aparıcı mütəxəssisi Jalə Bənnayeva əmək bazarındakı müasir tendensiyalar, yeni çağırışlar, gənclərin məşğulluq imkanları və bu istiqamətdə dövlətin həyata keçirdiyi proqramlar haqqında məlumat verib. Həmçinin əmək bazarının dəyişən strukturu, rəqəmsallaşma və texnologiyanın təsiri ilə formalaşan yeni ixtisaslar, bu sahədə aparılan islahatlar barədə danışıb.
İnfosessiyada gənclərin əmək bazarına uğurla daxil ola bilmələri üçün zəruri olan bacarıqlar, təcrübə proqramları, könüllülük fəaliyyəti və karyera planlamasının vacibliyi vurğulanıb.
Sessiyanın sonunda tələbələr tərəfindən ünvanlanan suallar cavablandırılıb.
